[微血腥] 覺能之戰 (逢二、四更新): 敵或友篇第二十三章：賽前準備 (四)

「等等先！你唔係上年先入隊咩？而且佢而家就上到隊長喇喎？」梓旻不解問

「佢本身就係申請入先鋒隊，係上頭唔批唧！Curse好有上進心，而且好想上電視，上到隊長級就多咗對外宣傳同匯報嘅機會。仲有，M隊嘅人冇乜人想擔大旗，上得快都正常。」美慧解釋

「好！總之我地就要小心呢兩個人啦！而家我想問我地係咪只係參加領地戰？參唔參加變陣同卧底戰？」澈硯插問

「我建議唔好喇！我提提你地，同春秋賽唔同，今次係要帶武器打！即係你地都算係第一次參加比賽，我覺得你地都係試下先。」美慧用筆敲打桌子

「但……但我……想試下玩卧底戰……」甚少發表意見的樺道，眾人也十分驚訝，尤其梓旻





「點……點解？」梓旻問

「因為……Rose同Dali，當然我唔係懷疑你地啦！但如……如果仲有其他間諜，我想……我想有啲準備。」樺吞舌吐吐的回答，其他人也點頭同意，唯獨梓旻沒有反應，她的反應及提議讓梓旻對她更有戒心

「好！咁就報領地戰同卧底戰？冇人反對？」美慧問，眾人也搖頭表示不反對。她寫在白紙上，再在平板電腦開出一張地圖說：「好！傾下今次點合作！睇返西北部沼澤公園地圖，有一半都係溪畔，三個領地响三個觀鳥屋，一個係北邊，一個係西南，仲有一個係東邊。當然就要當日先知自己係邊啦。」

「我諗我可以係領地守住。」樺首先開口

「我地而家傾緊領地戰可？」梓旻怕被發現自己在防避樺，立即補上：「我可以打前線啲。」





「卧底戰就最好唔好得一個人守喇！」美慧說

「我就唔介意！只要係樺就得。」澈硯笑著看向樺，梓旻只覺得噁心，而且不知是否梓旻多疑，總覺得樺在迴避澈硯的眼神

「停啦！好冇？」美慧鄙視的看著澈硯，再說：「你同澈硯嘅能力都比較突出，多數會俾人針，直接衝上去同人打好過。」

「咁我同楓？」詡問

「你地……自己搵嘢做。」美慧說完大笑





「咁叫傾合作？」詡不滿道：「我同楓不如就守住附近睇下有冇人嚟攻擊啦！睇返地圖，每個觀鳥屋都有至少兩條路可以通過嚟，一人守一條會安全啲。」

「好呀！」楓大叫

「就咁話！但我地最好都係一齊去技能訓練場睇一次大家嘅能力先比較好，至少知要輔助同合作點做！」梓旻提議：「不過如果遇勁人就要到時再諗諗。」

「好！咁卧底戰呢？」澈硯問

「你絕對唔可以同樺一組，一陣樺中咗卧底，我地就大獲！」詡指著澈硯說，澈硯傻笑

「如果卧底戰嘅話，係咪都係一對一比賽？」梓旻問

「係，咁就最好兩個人守觀鳥屋比較好？」美慧問

「應該會比較好，雖然卧底可以有兩個……應該唔會咁唔好彩掛？」詡苦笑





「咁由邊兩個守？」美慧問

「不如我同樺！」梓旻舉手提議：「我地既可遠攻，又可近防。樺o唔ok？」

「可以呀！」樺點頭

「咁我地幾個就主攻對面啦！」詡續說：「都係個句如果遇勁人就要到時再傾。」

討論完覺力賽的內容，剩下的時間也是閒聊過去。