[微血腥] 覺能之戰 (逢二、四更新): 敵或友篇第二十三章：賽前準備 (三)

「吓？咩意思？」梓旻驚訝問

「因為Rose，暫時未公佈少咗位隊長級，對外公司仍然想隱瞞，所以到時小冊子上面會寫足數。但始終冇嗰個人係度，所以Cut咗隊長級玩就可以唔覺少咗個人。」美慧吃著芒果乾解釋道

「但黎達都走咗啦？而且瞞到一時，瞞唔到一世！」詡想拿一片芒果乾，但美慧整包拿走了

「隊員年年有人走㗎啦！呢啲少嘢冇人理，但隊長級接觸到重要情報多。而家其實都諗緊升邊個，就係睇今次覺力賽。樺應該知多啲內幕。」美慧露出勝利的笑容看著詡，這讓詡很不爽

「係，以我所知，暫時係隨身帶糖嘅Candy同毒咒妹妹Curse之爭……Curse係鍾意人咁稱呼佢。」樺一邊說，美慧一邊從平板電腦按出兩張相，兩張相似乎也是由報章截圖而來。兩個的風格完全相反，一位打扮黑白為主，黑色長髮加上憂頭苦面，口咬著一枝不知是什麼的東西；另一位打扮色彩繽紛，淺啡髮雙馬尾，粉紅色短裙配上黑白間上衣，在向鏡頭眨單眼擺姿勢。





「嘩，仲妹妹？人地後生佢好多喎！」詡道

「Curse？佢爭隊長？」澈硯興奮的說，沒有理會詡

「你可能調轉咗，彩色嗰個係Curse，黑白嗰個係Candy。」美慧指一指兩張相

「嘩，個名同個形象都差好遠喎！」梓旻瞪大眼

「Candy成日帶糖係因為個人好悲觀，好容易心情唔好，糖係可以幫佢舒緩壓力同不安。亦因為佢事事緊張，做嘢好謹慎，所以公司考慮佢升為隊長。」樺解釋





「佢咁易擔心都唔會想升啦！」詡道

「佢好似擔心未來退休冇錢用會好慘，如果升職有更多人工同福利，佢心甘情願嘅。當然佢都有擔心做唔掂之類，但公司有自願降職機制，而家有得升會想升咗先。」樺回應

「咁佢戰鬥方面勁唔勁？我地遇到佢，佢可能會出全力打我地喎！」楓吃著薯片問

「佢本人係冇乜戰鬥力，腦袋唔叫好聰明，但都算轉得快。佢做指令官多數都可以冇重傷全身而退。佢嘅武器都唔稱得上武器，就係唔同形式嘅糖，佢會派俾唔同隊員，啲糖有治療同強化嘅功能。」樺說明Candy的能力

「我地食唔食得？」楓兩眼發亮





「可以，因為啲糖唔識認人，我地可以試搶，但有冇咁容易搶到就唔知。」樺微笑回答

「咁個位叫Curse嘅呢？」梓旻問

「佢純粹喜好奇怪，我冇乜接觸佢，但我記得佢冇治療嘅能力。」樺努力回想Curse的能力

「佢嘅能力係毒殺同強化為主，武器係吹泡機，佢會用AP操控泡泡嘅移動，我未學到呢招。雖然佢毒嘅能力冇我咁利害，但一個泡泡就可以令皮膚發紅，更多就發痕，再多會腫脹，甚至爛開。而強化方面就同我似少少，因為控制唔到，直接強化會令對方過度強化而控制唔到自己能力，可能仲會令對方肌肉疲勞等等。以佢性格，一定想升，最想有人注視佢就最開心。」詡詳細說明Curse的能力

「嘩！好熟人地喎！唔怕女朋友吃醋咩？人地仲幾靚添！」詡笑言

「傻啦！仔嚟㗎！何況冇人靚過我女朋友！」澈硯輕吻樺的手背，梓旻想起樺的謊言就開心不起來

「仔嚟？」詡及楓大叫

「係，偽娘一名。未變性添！我地一齊訓練嘅時候仲一齊沖涼同去廁所，個陣佢個妝都冇咁勁！」澈硯回憶起與Curse的過去