[微血腥] 覺能之戰 (逢二、四更新): 覺力賽篇第十一章: O隊的卧底戰 (四)

比賽當天的早上，梓旻眾人約好回到O隊辦公室作最後討論（實在沒有地方比這裏更安靜），然後梓旻獨自離開迎接家人到會場後，再到訓練場作最後討論。當他們到達辦公室門外，有一件令人驚訝的事發生，一向不修邊幅的浩政居然悉心打扮，粗框眼鏡換上了隱形眼鏡，雜亂的短髮也梳理好了，衣著也不是平日的灰灰黑黑，現穿白色短袖圓領汗衫、白間黑底的運動褲及深藍運動鞋，雖然外人未必發覺這已是浩政盡力打扮，但認識的人必定知道。

「嘩！搞乜？」詡率先大叫起來，梓旻及逸樺如夢初醒般望望詡，再望望浩政

「見人！」浩政臉上掛著大大的笑容，是他們從未見過

「見咩人？」楓八卦地笑起來

「唔關你事！」浩政看來非常興奮





「一定係見鍾意嘅人啦！」美慧特別停調「鍾意」二字，壞笑起來

「多事！」浩政大步離開了

他們進入辦公室時，辦公室內傳出大笑的聲音，鹿仔及亞豪在捧腹大笑，不用多想也知他們笑的原因。

「哈哈哈哈⋯你哋嚟喇？有冇見到？有冇見到？哈哈哈哈⋯」亞豪看似快要窒息了

「見到，但冇你笑得咁誇張囉！」梓旻也不禁笑起上來





「你哋有冇問佢點解搞成咁？我哋問咗⋯我哋問咗⋯哈哈哈哈⋯」鹿仔似乎也快要窒息了，然後滑稽地模仿起浩政：「我要見人吖！哈哈哈哈⋯」

「坦白講，佢咁打扮係幾好睇，加上佢個樣本身就幾靚仔。」Kiki拿著一杯飲品出來喝了一口：「如果唔係平時咁嘅款，我都會鍾意佢。」

「唔好俾Crystal 聽到添呀！」詡提醒

「哎吔⋯浩政如果有鍾意嘅人，Crystal 都幾慘。」樺皺眉

「見到佢著到咁，又咁開心咁見人，無論見咩人都好，Crystal 都慘㗎啦⋯⋯」美慧補充





「究竟佢見咩人呢？好想知！」楓興奮地說

「我哋都想知，如果唔係有後勤工作要做，我一定會跟蹤佢！」亞豪笑說

「係喎！掛住笑，你哋唔係夠鐘喇咩？」Kiki緊張地問

「大獲！走先！」鹿仔二人沖沖離去

「我都有嘢要做，我走先！」KIki放下杯離去

辦公室剩下他們五人作最後討論，然後於第一場比賽前約四十五分鐘，梓旻離開辦公室，到甘氏大廈外接待他的家人。梓旻的家人就像小學生來遠足般興奮，當然除了姐姐，她似乎有點不情不願的。

「哎吔，乖仔，你好似又瘦咗！」梓旻的母親胖胖矮矮的，臉上帶點憂慮

「係肌肉結實咗咋，媽！」梓旻回





「一陣會唔會死人流血㗎？」梓旻父親偏胖，比梓旻矮一點，說完這話後被母親盯著：「咩喎，咁打鬥緊係有傷亡㗎啦！」

「你可唔可以適當時候講適當嘅嘢嗻？你好想個仔傷亡咩？」母親有點生氣

「比賽有大會睇住，唔會有事嘅，一定有人做支援，有人死就唔會對外公開啦！」姐姐終於開口，本以為終於不用再讓母親擔心，怎料她繼續說：「⋯但實戰就唔同喇！」

梓旻立即插嘴：「比賽場地係嗰邊，我帶你哋去，我幫你哋買咗飛。」

梓旻把父母及姐姐帶到適當的位置後就離開，母親就像第一天送孩子上學般，既憂慮又為兒子成長感恩惠。梓旻轉身離開，走到最後一排坐位時，看到楓在探頭偷望，看到梓旻後逃走。

「喂！搞咩呀你？」梓旻追上楓

「冇⋯冇呀⋯」楓吞吞吐吐的





「你頭先鬼鬼祟祟咁，係人都知你有嘢啦！」梓旻記得楓對他的家人特別有興趣

「我⋯我⋯我想知你屋企人生成咩樣嗻⋯」楓不敢望梓旻

「你都幾八卦⋯」梓旻加強語氣

「對⋯對唔住囉⋯」楓似乎知道自己做了不應該做的事

礙於楓是組員，楓的心情有可能影響比賽，加上生笨蛋氣也不是明智的決定，所以梓旻還是說了兩句好話，讓楓不會太難受。他們一同回到訓練場集合，詡及美慧已在等待他們。

「點解你兩個一齊返嘅？」詡問

「佢走嚟偷睇我屋企人咩樣。」梓旻答

「你係咪傻架？」詡驚訝地說





「我好奇嘛⋯⋯」楓低頭小聲回答，就像做錯事的小孩子般

「咁好奇？我同詡都去搵自己屋企人，點解你又唔跟我哋呢？」美慧意義不明地質疑楓

「你突然擔心啲咩？」梓旻不明白她的問題用意

「你⋯你哋都冇兄弟姊妹⋯我⋯我第一次見人同我一樣有兄弟姊妹嘛⋯」楓吞吞吐吐

「第一次見人有？」美慧問

「你有兄弟姊妹？」詡的驚訝聲音蓋過了美慧的問題

「我…我有呀！我有個四歲大嘅細佬！好叻㗎！叻過我！」楓就像小孩子般興奮起來





「你差唔多廿歲喇喎！四歲叻過你咪天才？」美慧繼續質疑

「唔係唔係！考慮到楓呢個人嘅特殊情況，可能只係普通四歲小朋友咁「叻」。」詡道

「唔好咁衰啦你！」梓旻拍一拍詡

「對唔住，我遲咗！」樺終於來到

「咁遲㗎你！我哋啱啱先楓原來有個細佬！」詡說

「係？」樺在喘氣，應該是很急地趕過來

「唔好傾住喇！準備比賽先啦！」梓旻提醒