[微血腥] 覺能之戰 (逢二、四更新): 覺力賽篇第十一章: O隊的卧底戰 (三)

「佢做緊咩？」梓旻問

「我諗佢檢查緊隊員狀態，以防被Rose強制強化。」Albert解釋

「吓？強制強化咪可能係卧底？敵人幫佢喎？」梓旻認為這應該是找到卧底的捷徑

「錯，強化都可以分程度，輕度強化嘅效果可好微，微到冇乜強化咁，但⋯⋯即使係咁，Rose一解除強化都會對身體造成不適應，時間短啲，毒性小啲，你想像搭完船落返陸地個種浮下浮下嘅感覺就係；而時間長會變慢性毒，最後又係上癮咁，一解除就出現戒癮反應。」Albert用手模仿船浮動的樣子

「咁完咗比賽或者⋯完咗任務，啲隊員咪好辛苦？」梓旻想像道友戒癮的樣子





「好似要一段長時間，慢慢減量咁戒癮。」Albert舉起兩隻食指，兩指由遠收近

Rose此時於A2及B2之間的位置，相信她主力留守，她身後站著同隊的M隊隊員，與變陣戰不同的是，卧底早已定好，並且已藏於隊中，大會不能隨心控制隊員所屬的隊伍，所以兩人一起留守，有事起來仍有人牽制卧底。

亞豪那邊二人糾纏了很久，終於都停下來了。他們擺好姿勢一邊對望，一邊轉圈，亞豪轉到背向富哥等人時，慢慢的向後移動，與亞豪對打的P隊成員跟著慢慢向前行。突然，亞豪向富哥那邊拔足狂奔，那位P隊成員想追上時，被不知何時走到B2的鹿仔用AP壓低，整個人趴在地上不能動，使勁地掙扎著，發現掙脫不了，即狠狠的盯着鹿仔。

與此同時，亞豪跑向正與富哥對峙的P隊隊員那邊，亞豪越過富哥，直接向著對方的胸口飛踢，那P隊隊員躲避不及，承受不了重擊，整個人向著同隊的T隊隊員飛去，雙雙掉在地上，這就為梓旻帶來了今日第一份工作。

梓旻把傷者移往醫療室後，回到崗位時，眾人已把Rose包圍。此時，比賽已經過了半小時，如Rose的能力奏效，大概O隊眾人也「時辰到」。但事實是，只有和Rose一隊，一起留守旗位的那名Ear Mark隊員暈倒。O隊眾人也成功拿到旗幟。





比賽完成，電視直播上列出這場參賽者的名單和指出身為卧底的隊員，卧底是Rose及Dali，只能說對面隊的運氣實在太差了。

梓旻忽然想起浩政也曾被迫參加比賽，問：「做卧底要似卧底，咁浩政點算？佢咁勁，唔出盡全力壓對面隊，就已經好唔「卧底」啦？咁點攞最高分？」

「哈！佢⋯」Albert右手蓋面，按了按頭部兩側，像想起某些頭痛時般，再說：「佢有一年將啲隊員拋嚟拋來，再偷偷拋一兩個近支旗。仲有年，佢剷起成塊地板，再將地板同碎石喺空中旋轉，用地板同大型碎石做掩飾，偷偷飛幾個隊員近支旗。諗緊都痛苦⋯」

「即係扮係攻擊，其實係送你一程咁？」梓旻嘗試想像那場景，不知為何有點好笑

「送你一程⋯你呢句用得幾貼切。」Albert苦笑





接下的兩場也是拋石或肉駁戰，梓旻非常輕鬆的完成了工作後，就離開了比賽會場。由於明天要比賽，他快速享用完晚餐就回到宿舍，於宿舍的走廊遇見剛洗完澡正打算回房休息的阮超，他拿著朱古力奶與梓旻打招呼：「Hi，你聽日係第幾場？」

「第四場，你呢？」梓旻問

「我聽日最尾個場，你要加油喇！你個組啲人除咗你同逸樺都冇乜正常人。」阮超咬著飲管說

「冇乜正常人？」以梓旻記憶，阮超與詡及楓並無交惡，他的語氣又不像故意貶低他們

「先唔研究嗰位支援組隊員係點。韋楓香蠢已經出曬名。」梓旻萬萬估不到楓已經笨得那麼有名，阮超繼續：「而詡佢懶到一次訓練都冇做過，我都唔知你點算。」

阮超說完後就亨著歌離去，梓旻驚訝自己有點認同阮超的說法，尤其關於楓的評論。走回房間的路上，也一直鎖緊眉頭。當他走到自己房門時，遇上剛出門的詡跟他打招呼。

「做乜個樣咁愁？」詡指指自己的眉頭皺一皺

「我⋯擔心緊聽日比賽之嘛。」而其中一個令梓旻擔心的因素現正站在他面前





「唔使咁緊張喎！比賽之嘛！」詡這過份輕鬆的語氣讓他更為擔心了

「詡⋯呀⋯我想問⋯你平時有冇練習過㗎？」梓旻忍不住問，期望詡實際上背著所有人練習去了

「有！同你哋一齊個陣咪練咗囉！」顯然詡的答案只是增加了梓旻的擔憂，詡沒有等梓旻問下句就離開了。那晚，梓旻久久也睡不了，為自己有點不幸地認識了全隊階知最笨最懶的二人而後悔或失望。