[純愛]只想再見妳: Ep1

「呤呤呤~」無情既鬧鐘聲一下子將我喺美好既夢境拉回現實。
「俾.我..瞓多陣先啦...」
但鬧鐘完全無理我既感受,不斷嘈,不斷嘈,就算我㩒熄咗佢,都仲不斷嘈,直到我身心俱疲,放棄掙扎。一落床,再望一望嗰鬧鐘
「哇屌,已經七點半喇,今次實遲到啦」我即刻係衣櫃求其拎件校服,連牙都無刷,就一嘢衝出門口

大家好,我叫浩賢,平時大家都叫我做賢仔,今年十五歲,喺九龍城區某間男校讀緊中四。
唔知係咪因為讀男校既關係,我一直以來都係異性絕緣體。我自問自己嗰樣正正常常,又唔係肥屍大隻,亦都唔係d油頭毒撚,但先咪話女朋友啦,連普通既異性朋友都係十隻手指數得晒。眼見住身邊既朋友一個一個咁出pool,都真係咪話唔羨慕啊。

「喂~賢仔,又準備遲到啊」當我好趕咁跑返學校既時候,一個肥胖身軀突然係我身後出現。
「屌,肥強,你咪又一樣」




無錯,嗰個肥仔個名就叫做肥強。佢人如其名,係確確實實既一名肥仔。佢由中一開始就一直同我同班,係我其中一位好兄弟。由識佢到宜家,都係一樣咁肥,不過聽講佢小學曾經瘦到得返排骨,係升上中學嗰個暑假唔知受咗乜刺激先變到咁肥。
「叮噹叮噹~」正當我地準備跑入學校門口嘅時候,校園鐘聲就無情地響起。
「頂,又係差幾秒!」
「都反正遲咗,不如去M記食埋早餐先。」肥強提議。
「唉,唯有係咁啦,真係唔好彩啫」