空想短故事: 藍牙耳機
有時我真係唔明，點解我個藍牙耳機係咁設計。
我用嘅唔係啲咩大牌子嘢，只係啲唔算平又唔算貴嘅路人牌子。耳機嘅設計係冇開關掣，用嘅係觸碰式設計，即係掂一掂佢就會有反應嗰隻。本來我係覺得幾得意嘅，冇掣好似高科技啲咁，掂住感應嗰忽就操作到，開機熄機、暫停開始呢啲都只需要就咁掂一掂，好似幾有型。點知用落先知原來係伏。首先佢感應嗰度面積大到唔合理，都唔知係設計俾邊個嘅，手指有咁粗。其次佢嗰感應器仲要好敏感喎，有時完全唔係我手指點到，可能只係攤係床上嗰時壓住咗，佢都會自己觸發到，無端端暫停我首歌，甚至自己熄機，搞到我真係好燥底。而且呢部耳機有一個功能，就係長㩒幾秒之後佢會開始接收四圍嘅聲音，經過耳機內部擴大後，同你本身播放緊嘅嘢一齊播。都唔知呢個功能有乜叉用，開咗之後個感覺就好似戴住啲聽障人士帶嘅助聽器，跟住再同時帶埋耳機咁，搞到啲聲好雜。我真係想知係邊個咁弱智諗埋啲咁嘅嘢出嚟，仲要真係實裝咗，同啲人追求嘅降噪完全背道而馳。但即使我已經將個設計者嘅祖宗十八代都屌過一次，又可以點，我得呢個耳機，冇得揀。
呢晚，我又好似平時咁，深夜帶住耳機，自己一個打機。我玩嘅game裏面有一隻怪物，會打人，但冇傷害，只會圍住我彈下彈下，好似吉祥物咁，所以就俾我當寵物咁養住。
「嘖，啲隊友真係廢到有剩。」而家我帶著嗰隻俾我當寵物養嘅怪物，同人係個game裡面開片，但因為隊友太廢，所以輸到阿媽都唔認得。
我有啲燥底，一下攤咗落張床度，平復下俾人雷嘅心情。但過咗幾秒之後，發生咗一件令我更加燥嘅嘢。個耳機轉咗去收音模式，因為我唔覺意壓到個感應器。
「妖！」呢下引爆咗我嘅心情，因為呢個模式收音之餘仲會擴音，所以成日收到埋啲奇奇怪怪嘅雜音，真係好反智。
而今次就有啲嗡嗡聲，有啲類似救護車嘅聲，仲越嚟越大聲。
但我冇多理，而且啲嗡嗡聲搞到我好煩躁。我嬲爆爆咁熄咗個擴音模式去，唞啖大氣冷靜少少之後重新開咗鋪game。
二十分鐘後。
冇諗到，我又遇到低能隊友，玩到一半我已經頂唔順。
「真係扑你個街！」我將兩邊耳機扯出嚟，一手將佢地擲埋牆，發洩情緒。
不過擲完之後我就即刻後悔，呢個係我唯一一個耳機，擲壞咗我就麻煩。所以唯有死死氣咁走過去執番起佢，帶番落耳仔度。
但神奇嘅係，嗰耳機嘅收音模式又自己開咗。我又聽到二十分鐘前嗰啲嗡嗡聲，唔知點解，啲聲好似會貫穿我個頭咁，搞到我有啲頭暈。呢個耳機我用咗咁耐，第一次聽到啲咁嘅雜音。
我拍咗自己塊面幾下保持清醒，手指掂住感應器，諗住熄咗個收音模式佢。但係就係嗰收音模式熄之前嘅一秒，一陣極強，極刺耳嘅聲突然出現，直入我嘅大腦。係嗰聲貫穿我個頭之後，個腦就好似腦震盪，感覺有啲似俾人用鎚仔敲咗下咁。
我腳一軟，僅僅靠一隻手撐住嗰窗台先冇跌底。
「搞乜春。。。」我恢復清醒之後嗰頭仲有啲痛，完全唔知發生咩事。
「呢個耳機係咪報復我。。」我一路咁諗，決定熄燈訓覺。冇幾耐，我就合埋咗眼，安然入睡。
而當我再次打開眼，第一下望到嘅係一片綠色，自然嘅翠綠。
我撐起身，俾眼前嘅風景嚇呆咗。
我而家身處係一片密林之中。
四周圍好靜，冇蟬叫聲，冇水聲，只有樹葉俾微風吹郁嘅沙沙聲。而當我抬起頭望向天空，密密麻麻嘅樹葉幾乎將成個天空遮住，陽光係啲好細嘅罅隙透入，但對照明嘅幫助唔大。因為森林裡面有啲好薄嘅霧氣，令能見度變得好低，我只能夠睇度自己大概七步距離內嘅嘢。
係原地呆企咗好耐之後，我諗起啲電影同故事入面，測試自己係咪發緊夢嘅方法。於是就大大力係自己大脾肉度扭咗下。
一啲都唔痛。
我有啲意外，係第二隻腳嘅大脾度又扭一下，今次仲更加大力，大脾度甚至出現咗好大塊類似紅斑嘅嘢。
但都係一啲感覺都冇。
啫係我發緊夢？
我開始茫然咁四圍行，但行咗好耐，身邊都一樣係普通綠色嘅灌木叢同樹，完全冇任何象徵式嘅嘢，可以俾我判斷出有關呢個夢嘅任何資訊。同以前發夢唯一嘅分別，就係呢刻我非常清楚自己發緊夢，而且夢裏面嘅記憶同見到嘅嘢亦都非常清晰。
唔知行咗幾耐之後，我嘗試突破呢個好似輪迴咁嘅夢，係森林嘅周圍開始搜索。
但莫講話有用嘅嘢，連隻昆蟲都冇，呢度只有四樣嘢：泥、草、木、葉。
啊，唔係，數漏咗一樣嘢，霧。
跟住我開始檢查自己身上面有啲咩，隨即係褲袋度搵到一樣嘢。
係我個耳機。
冇其他選擇嘅我將耳機戴上，開機。但我冇任何電子器材可以連接，耳機唔會自己播嘢，而且因為塞住咗耳仔嘅緣故，森林感覺上變得更加靜。係我唔知下一步可以做咩嘅時候，我突然諗起收音模式。
見除咗嘅收音模式之外，都冇其他嘢可以做，就索性將佢打開。一開始咩都聽唔到。但當我開始行嘅時候，嗰耳機開始傳出聲。啲聲好細好弱，但隨住我嘅步伐變得越嚟越大，我開始分辨到係咩聲。
係訓之前聽到嗰啲嗡嗡聲。
我即刻將耳機除咗落嚟，而家嘅聲似乎俾訓前嗰啲有唔同，我只係聽咗幾秒，我個頭已經有啲唔舒服。
但除底之後我諗咗諗，又將耳機戴番上去。
我冇任何其他可以做嘅嘢，除咗帶耳機聽嗰啲我越行佢越大聲嘅嗡嗡聲之外。
嗡嗡聲一路係咁播，完全無間斷，大概就好似加特林機槍不斷掃射咁，搞到我行唔到直線。係行咗一段路之後，我終於頂唔住，挨住一棵樹坐咗係地下。
「呢個夢到底幾時完。。。」我自言自語。
係休息期間，我慢慢瞇埋眼，將精神集中到兩隻耳度，啲嗡嗡聲完全冇結束嘅跡象。但唔知點解我好似開始慢慢習慣啲聲，佢開始冇咁刺耳。
於是我企起返身，繼續冇目的咁行，而耳機嚟面嘅嗡嗡聲就隨住我越行而越嚟越大。
直到我係迷霧中見到呢個森林嘅第六樣嘢，一舊巨石。
舊石足足有我兩倍咁高，係啲霧嘅遮蔽之下，我僅僅睇度舊石嘅頂端。係我企係呢舊巨石前嗰時，耳機嘅嗡嗡聲變得好強烈，但我居然頂得順，甚至唔需要將嗰耳機除落嚟。
係環繞住舊石行咗一個圈之後，我發現咗舊石嘅背面有個好似山窿咁嘅嘢，於是我就行咗入去。
裡面係一個類似石室嘅嘢，明顯有人生活過嘅痕跡。石室嘅牆上面有啲火把，而火把正下方有好多灰，支火把似乎已經燒咗好耐。中間有一張石檯，上面刻咗啲嘢。我定睛一望，發覺一幅人形嘅畫，只有外型，嗰個人嘅四肢有齊，但冇五官。呢個「人」身邊仲有啲好奇怪嘅線條，連接住佢嘅背脊，冇任何規律咁向外伸。
我嘅注意力轉向另一樣值得注意嘅嘢，一條純黑色嘅呔。佢擺咗係人型畫嗰個「人」嘅頸處，就好似嗰個「人」真係戴住條呔咁。
我有啲好奇，將手伸去條呔度，將佢攞上手。
但就係我拎起條呔嗰一瞬間，耳機傳嚟一下極刺耳嘅聲音，同訓之前嗰聲好似，但今次就唔止係鎚仔打一下，而係好似嗰頭俾人重擊咁，我兩眼一黑，失去意識。
再次打開眼，今次見番自己房嘅天花板，個頭有少少痛，但除咗頭痛之外，又冇啲咩異常。我清楚記得自己發咗一個九五搭八嘅夢，但坐咗係床度好耐，都唔知嗰夢係咩意思，最後我放棄思考，走咗落床。
本身以為又會係一日普通到唔會記得嘅日子，直到我食完早餐，諗住聽下歌，將個耳機囉出嚟嗰時，我又諗起沉晚個夢，望住個耳機好耐。
我都唔知點解會發生啲咁嘅事，但就係不由自主咁望住個耳機，仲有種想快啲帶住佢，跟住帶咗就唔想除嘅感覺。
最後我冇再多諗，就將個耳機戴咗上去，跟住㩒咗首歌嚟聽。
係戴上咗耳機之後我就乜都唔想做，因為我怕一旦有嘢做，就要除底個耳機。
就咁過咗幾個鐘，我乜都冇做，齋坐係張床度聽歌，嗰歌單都唔知重複咗幾多次，但我又唔記得自己聽過啲咩歌。
又唔知過咗幾耐，有人敲門，當然，我完全聽唔到。係到嗰個人走入房，將我個耳機扯落嚟我先知有人搵我。
「喂，你匿埋咗係間房成日喇喎。係度搞咩？」原來係老豆。
我完全冇過咗好耐嘅感覺：「冇搞咩，而家幾點？」
「已經四點喇。」
原來已經四點，即係我個耳機足足播咗七個鐘。佢居然仲有電，我對耳亦都冇帶耳機戴得耐嘅疲勞感覺。
「哦，已經四點喇？」更加奇怪嘅係，我居然一啲都唔驚訝。
「係啊，同埋你頭先聽唔到我敲門咩？我敲咗好耐你都冇反應。」
「聽唔到啊，帶咗耳機啊嘛。」
「咁你開嗰個收音模式喇，呢到又唔係街，啲噪音又唔會話好犀利。」
「哦。」
老豆好似有啲睇我唔順眼：「算，你冇嘢做就去收衫，幫輕下屋企。」
之後佢就冇再講嘢，推門走咗出去。
我當然冇理佢，本來戴番耳機之後係打算繼續齋坐，但老豆頭先嘅一句唔知點解搞到我有啲心緒不寧。
收音模式？
同今朝一樣嘅嗰種奇怪嘅感覺又出現，驅使我用隻手指長㩒耳機，不過今次我冇諗咁耐，好快就順從感覺將收音模式打開。
但同今朝唔同嘅係，今次我冇猶豫咁耐，就開咗個收音模式。
一開始冇咩特別，應該話，冇咩特別嘅聲。但咁樣其實有啲奇怪，因為正路嚟講，係應該聽到啲雜音，但而家係完全冇，我甚至懷疑自己係咪真係開咗收音模式。
呢個問題好快有答案，因為我開始聽到啲聲，一啲嗡嗡聲。同尋晚個夢嗰啲一模一樣，不過今次我冇覺得佢好煩，甚至有啲專注去聽啲嗡嗡聲，個腦自動忽視播緊嘅歌。
跟住就保持住咁嘅狀況，又過咗好耐，就快到訓覺嘅時間。
雖然期間我有除低耳機出房食飯、沖涼刷牙嗰啲，但我完全唔記得自己食咗啲咩，沖涼有冇洗頭，刷牙有冇擠牙膏。我做呢啲嘢嗰時係冇戴耳機，但心思就放哂係個啲嗡嗡聲上面。
夜晚十一點三十七分，我用同一個姿勢坐係床上面，今次我連歌都冇播，迫不及待咁打開咗收音模式，嗡嗡聲又一次出現。
凌晨兩點四十八分，我發現啲嗡嗡聲好似慢慢咁越嚟越大聲，我有啲興奮。
凌晨兩點五十六分，啲嗡嗡聲毫無預兆咁徹底消失，間房突然變得好靜，好靜。
我有啲意外，熄咗個收音模式之後又打番開，等咗十分鐘，嗡嗡聲依然冇出現番。
屌你老母，搞乜撚嘢。
我一開始有啲嬲，之後慢慢開始控制唔住唔知邊度嚟嘅怒氣，扯咗其中一邊耳機出嚟，好似尋晚咁一手擲出去洩憤。
正當我想扯埋另一邊耳機出嚟擲嗰時，同尋晚夢醒之前一樣嘅極強、極刺耳嘅噪音係個一邊傳出嚟，但唔知係咪因為我只係帶咗一邊耳機嘅關係，今次我冇好強烈感覺或者暈低，只係好似頭頂俾人拍咗下，天靈蓋震咗震，就冷靜咗落嚟。
坐係地下一陣之後，我起返身，發覺窗外面風有啲大。之後我就諗起老豆晏晝好似叫我幫佢收衫，但我冇收到，啲衫而家唔會仲晾緊係出面啊話？呢一機衫好似有好多係我㗎喎。
我推開房門行出去，客廳好黑，但我聽到啲唔知由咩電子器材發出嘅滋滋聲，好好聽。
我冇多作停留，去陽台經過廚房嗰時，我見到把菜刀反射月光發出幽幽白光。之後行出窗台，見到有隻曱甴係地下，我心裡面就係度諗，如果用頭先把菜刀一嘢劈落隻曱甴度，隻曱甴身入面啲漿爆出嚟會個點嘅畫面。不過我當然冇蠢到去試，啲曱甴跑得咁快，邊有可能劈得到佢，仲有可能劈到自己腳趾。
啲衫真係仲晾緊係度，仲俾啲風吹到盪嚟盪去，好似就快跌咁。我用咗幾分鐘將佢地收哂落嚟，期間無可避免咁整咗啲噪音出嚟。
就係我要離開窗台嗰時，我突然聽到出面傳嚟有節奏個嗒嗒聲，一開始好輕，跟住越嚟越重，越嚟越沉，越嚟越近。
係腳步聲。
我有啲緊張，又有少少興奮，隻手慢慢伸向嗰把反光嘅菜刀，係將把刀攞咗落嚟之後，我兩邊嘴角唔自控咁向上彎。
一個高大嘅人影出現係廚房門口，佢一手拍落啲堆燈掣度，廚房嘅燈同時間全部打開，甚至連抽氣扇都開埋。
係老豆。
真係掃興。
但又好奇怪。
我將菜刀藏係背後，老豆開口問：「搞咩咁嘈啊？凌晨啊而家。」
「你唔係叫我收衫？我啱啱醒起我未收，所以咪去收囉。」
「凌晨三點幾先嚟收？咁你收完未？」
「啱啱收完。」
「咁就去訓喇。」
真係好奇怪。
「老豆，點解你著住套西裝嘅？」
老豆呢刻著住純黑色嘅西裝褸西裝褲，同埋係西裝褸入面著住白襯衫，頸處打咗條純黑色嘅呔。
「你咪理咁多，快啲去訓！」
我冇再多問，將背後嘅菜刀偷偷放低，行番入房，攤上床。
我望望嗰鐘，凌晨三點三十四分零九秒。
但我一啲都唔眼訓。
我決定打陣機先再講，打開嗰game，又見到嗰隻俾我當寵物養住嗰怪物跳埋嚟，係我身邊彈下彈下。
佢係我身邊彈下彈下其實就係想攻擊我，但我講過，佢打人冇傷害。本來我係因為呢點先將佢留係身邊，但我而家覺得佢好撚煩。
「屌你老母。」
我攞出一把識噴火嘅武器，一嘢燒落隻怪度。
佢俾火燒到之後即刻好痛苦咁係地下碌嚟碌去，跟住掙扎嘅幅度越嚟越細，最後係我面前變成一舊完全睇唔出佢本身係咩嘅焦炭。
見到呢一幕，我突然好想笑。
嘿。。嘿嘿。。嘿哈哈。。哈哈。。。哈哈哈哈哈。。。
「哈。。。。哈哈。。。哈哈哈哈。。」