穿越時空，冒充平行世界嘅另一個自己，再去呃佢條女上床: （156）

呢一刻，Mike佢地唔單止手腳發黑，連塊面都變成紫色。

睇嚟啲毒已經滲透佢地全身。

時間一秒一秒咁過，再唔諗辦法打敗敵人，取出解藥，咁自己嘅同伴就會一命嗚呼。

問題係，阿鬼手手腳腳斷曬，喪失曬作戰能力。莫講話反擊，佢連起返身嘅能力都無，仲要靠張醫生老婆扶起嚟。

可惡…我真係無用…再咁落去Mike...美國鷹...張醫生...子瑜都會無命…





點算好…點算好…

阿鬼嘅內心極度焦躁不安，不停責備自己同努力諗辦法。

就喺呢個時候，佢眼尾睄到地下碌過一條螺絲，應該係喺佢身上嘅零件跌出嚟。

而就係呢一條細細嗰螺絲，令佢腦筋一轉，諗到反擊嘅方法！

「外星人！時間仲剩幾多？」阿鬼高聲問遠處嘅毒藤蔓獸。





「嗯？乜你咁都仲未收皮？」

毒藤蔓獸有啲啲驚訝，思考左半秒，回答對方嘅問題：「五分鐘！你個廢人唔好話我聽，你仲諗住救你啲同伴？我係你就匿埋算啦，費事喺度丟架啦！」

阿鬼無出聲反駁，心裡立即盤算：得返五分鐘咁大把，雖然時間好緊逼，但點都要試一次。

之後佢喺張醫生老婆耳邊講左兩句說話，跟住張醫生老婆就用三頭六臂，抬返佢出去路中心。

斷手斷腳嘅阿鬼dup低頭，挨喺一堆雜物之中。





「搞成咁都仲出嚟獻世，睇嚟你真係好想落去陪你啲朋友！」

「……」阿鬼粒聲唔出，無任何回應。

「唔講嘢即係默認啦，係咁嘅話，咁我就成全你啦！」

講完呢句，毒藤蔓獸揮舞十幾條藤鞭，衝過去鞭殺對手。

阿鬼依然係無半點反應，亦無任何反擊嘅意圖。

「啪！啪！啪！啪！」兩秒之後，十幾條藤鞭瘋狂咁鞭打，將阿鬼嘅身體鞭到四分五裂，連個頭都批埋落嚟。

眨眼間，阿鬼徹底變成左一堆爛銅爛鐵。

「不自量力！咁嘅本事仲想打敗我！下世啦！」毒藤蔓獸當阿鬼個頭係波咁踢，一腳踢到無雷公咁遠。





殊不知，個「啦」字啱講完，忽然間佢受到強有力嘅飛踢攻擊，成個人向前仆左落地。

擰轉面一望，佢見到一個精鋼嘅機械人——全身著住堅實嘅裝甲，並且配備槍械武器。

「你…你係…咩人？」

「咁快就唔認得我啦！」個機械人撥一撥頭髮，隨即個樣由機械人樣，變成阿鬼咁嘅外貌。

「竟然係你…乜你唔係已經俾我收拾左架咩！」

毒藤蔓獸睇一眼嗰堆廢鐵，再望清楚阿鬼，驚訝對方居然仲未死。

「頭先我的確係俾你打敗左，只不過家陣我又重生啦！」





阿鬼一邊講，一邊睥住對方：「好啦，時間無多，我要喺三分鐘入面解決你！」

毒藤蔓獸起返身，拍拍身上嘅灰塵：「哼！即管放馬過嚟！」