穿越時空，冒充平行世界嘅另一個自己，再去呃佢條女上床: （140）

過左一陣，張醫生佢地入到房，見到Mike醒返，都放下左心頭大石。

張醫生同佢三個老婆先幫Mike量個體溫，聽下脈搏、心跳。

訓左兩日，Mike嘅高燒已經退左，身體似乎大致都回復正常。

「喺我昏迷嗰陣，發生過咩事？」Mike一口氣飲曬子瑜斟俾佢嘅水。

「發生嘅事就多啦，首先係冧橋，跟住嚟到港島就遇到外星人，我地仲喺佢手上，搶走左帝洛斯嘅斷角。」美國鷹回答。





「下？你地搶走帝洛斯隻角？」

「係呀！」美國鷹拎隻斷角出嚟，「拿，就係呢隻。」

Mike攞隻角上手望一望，與此同時，一股陰森可怕嘅氣息傳到身上，令佢背脊發涼。

「當時搶呢隻角嗰陣，你仲被帝洛斯個老豆上左身。」阿鬼fing一fing頭髮話。

「唔係呀嘛？無啦啦我俾外星人上左身？」





「原來，帝洛斯個老豆就係你肚入面嗰條蟲。」子瑜補充。

「竟然係咁？但點解我一啲記憶都無嘅。」Mike努力回想，但完全記唔起自己被帝尼爾上過身。

「無所謂啦，最緊要你人無事啫。」張醫生話，「你啱啱醒返，又啱啱退燒，建議都係再休息下。」

Mike點點頭，「嗯」一聲回答。

「係啦，Mike你兩日無食嘢，一定肚餓架啦，我依家就去整啲嘢俾你食！」





子瑜唔識整煮飯，遊艇亦無食材俾佢煮，佢所謂嘅「整啲嘢食」，不過就係沖啲即食麥皮，再溝罐頭豆豉鯪魚。

好老實講，Mike望住呢兜嘢，唔係幾開胃，但係子瑜第一次煮嘢食俾自己，點都要試下。

「點呀？係咪煮得唔好食？」

「唔係…都幾好食呀...」

Mike「good」一聲吞落去，跟住問：「我…我昏迷嗰陣…你一直都陪喺我身邊？」

「嗯！係呀！你昏迷嗰陣呢，周不時會皺埋眉頭，好似發緊噩夢咁。」

「唔係發噩夢，只係見返一啲回憶啫。」MIke回應話。

「回憶？你個鹹濕仔唔係諗起Judy同阿蚊佢地下話？我唔肯過你架！」





「梗係唔係啦。」

「咩話？唔通係Lulu？！」

子瑜呷醋個樣有幾分可愛，令Mike忍唔住笑左一笑。

然而，大家喺得埋一齊，或者佢應該敞開心扉，同對方透露自己嘅人生，無論係有幾咁失敗都好。