穿越時空，冒充平行世界嘅另一個自己，再去呃佢條女上床: （139）

草原上嘅大火，已經蔓延到去附近嘅山脈。

勝者為王，失敗者則猶如螻蟻一樣被踐踏。

帝洛斯望住另一個自己同啲恐龍，一齊葬身於火海之中，慢慢化成灰燼。

從今以後，佢就係宇宙最強，無人能敵，但係佢都仲未滿足。

佢要打低其他平行時空嘅自己，成為獨一無二嘅存在。





對佢嚟講，「帝洛斯」只能有一個。

嗰一個就係佢自己。

為左成為唯一嘅一個，佢決定要去抹殺其他時空嘅帝洛斯。

因此佢啟動時光機，瞬間轉移到另一個時空，再去邂逅另一個自己。

事實上，有「帝洛斯」存在嘅時空其實並唔多。





絕大部分嘅「帝洛斯」早喺就幾千萬年前，被流放地球嗰陣，無辦法成功生存落嚟。

即係話，能夠生存到依家嘅「帝洛斯」，都係萬中無一嘅強者。

而帝洛斯就係要成為強者之中嘅最強。


※ ※ ※







「Mike，你都係放棄吧啦，有啲嘢無得勉強架。」

「教練我得架！我相信只要肯努力，我一定可以游得返之前嘅成績！」

「你嘅情況你自己都好清楚，唔得就係唔得！」

「我唔甘心！我仲想繼續游落去，求下你俾我繼續留喺校隊！」

「唉！算啦好嗎！接受現實啦！」

「教練！教練…」

…
…





「咪唔開心啦，無得游水咪試做其他嘢囉…」

「哼！你就巴閉啦！就嚟有得選拔啦，家下做乜仲走嚟『潤』鳩我？」

「你誤會啦，作為朋友，我只係想安慰一下你。」

「收皮啦，我唔洗你安慰，亦都唔洗你理！唔該你以後唔好再煩住我！」

…
…

「你個衰仔日日喺度本pea，書又唔好好讀，你話你有咩用！」

「你顧點你自己先啦，一日淨係識打牌賭錢，返到嚟仲要喺度嘈怨巴閉！」





「哎呀！話你仲要駁嘴，你真係爛泥扶唔上柄！」

…
…

「Mike？你係咪醒啦？Mike？」

昏迷左好耐嘅Mike慢慢睜開眼。

「哈！太好啦，你卒之都醒啦！」

子瑜終於等到Mike醒返：「你知唔知你昏迷左，足足兩日兩夜！擔心死我啦！」

「乜我暈左咁耐…」Mike記得自己喺橋上面出完招必殺技，打敗左隻外星人後就暈低左。





中途好似有醒過嚟，但就諗唔起發生過咩事。

「我去斟杯水俾你！」子瑜行出房去斟水，並通知張醫生佢地。

昏迷嘅呢段期間，Mike發左一個好長嘅夢。

或者唔應該叫做「夢」，畢竟夢入面見到嘅，全部都係發生過嘅事，令佢一次過回憶返曬過去失敗嘅人生。