穿越時空，冒充平行世界嘅另一個自己，再去呃佢條女上床: （133）

「請問你係咪想揾帝洛斯？」美國鷹踏前一步問。

「咦？地球人？」力天奴終於發現美國鷹等人，「乜你地知道佢喺邊？」

「知呀，只要你將手上嘅斷角交俾我，咁我地就帶你去。」

「你地真係知我嘅帝洛斯BB喺邊？」力天奴再問一次。

「係。」美國鷹假裝肯定咁回答。





力天奴猶豫左幾秒，跟住就慢慢行過嚟。

美國鷹個心有啲虛，點不知對方嚟到面前，真係遞左隻斷角俾佢。

估唔到居然會咁順利，力天奴咁輕易就信左，美國鷹同其他人都感到有啲意外。

美國鷹伸手接過隻角嘅瞬間，一股可怕嘅邪氣走遍佢全身。

呢個就係帝洛斯斷左嘅角，蘊含著深不可測嘅力量。





「隻角已經俾左你，你即刻帶我去見我嘅帝洛斯BB！如果你呃我，咁我就會將你地全部人碎屍萬段！」力天奴嚴正警告。

「Er…OKOK…咁你就跟住嚟啦。」 美國鷹吞一啖口水，佢無料到對方係咁順攤，咁反而令到佢有啲不知所措。

「喂，快啲諗辦法撇甩佢啦，再咁落遲早穿煲架。」阿鬼細細聲哄近美國鷹耳邊講。

「我都唔知點樣撇得甩佢，你有無辦法呀？」美國鷹問返阿鬼。

「唔係呀嘛，你唔係有計架咩…」





「喂！點解行左咁耐都仲未到嘅！你地係咪玩嘢？」力天奴臉色一沉。

「唔係唔係，就快到架啦。」美國鷹慌忙解釋。

結果遊左一輪花園，佢地都仲係無辦法全身而退。

力天奴容忍度有限，失去耐性：「你地係咪呃我！你地根本就唔知帝洛斯BB喺邊度！係唔係！」

紙始終都係包唔火，就算美國鷹再狡辯，對方已經唔會再信。

「我！最憎人講大話！快啲還返隻角嚟！」力天奴怒火沖天，四周圍捲起陣陣黃沙。

「Shit！無辦法，一於同佢死過啦！」

美國鷹將隻角交俾張醫生保管，然後拎出機械怪人嘅泡泡槍，同嗰條可以令時間靜止嘅天線。





至於阿鬼就放低膊頭上嘅Mike，交返俾子瑜照顧，上前對付隻嘢。

「砰！砰！砰！」

佢連續射出烈焰炮，但力天奴身上有堅厚嘅鱗片，完全抵擋曬啲攻擊。

美國鷹都想出招，問題係附近黃沙滾滾乜都無，都唔知有咩嘢可以融合成武器。

「你條友滿口大話，等我解決你先！」力天奴膊頭飛撞，向住美國鷹攻擊。

好在有條天線護身，敵人一埋身，嗰條天線就著燈。

力天奴全身定格唔郁得，隨之更被反彈走。





「可惡！！！」力天奴極度憤怒，使出佢操控風沙嘅能力，刮起滾滾黃沙，想將對面咁多人活埋。

就喺呢個時候，咁啱有三隻外星人經過，一隻生得好似螺絲批、但個頭係尖嘅怪物，一隻係揸住弓箭嘅漂浮水母，另一隻係見過嘅紫色公雞。

佢地全部都係C級或以下嘅外星人。

美國鷹捉緊機會，噴出三個泡泡，將隻螺絲批怪、水母嘅弓箭，以及嗰隻公雞三者融合成一體。

螺絲批化成帶紫色羽毛嘅長箭，配合埋嗰把弓，就成為一把武器。

美國鷹冒住風沙，射出一箭。

就係射出去嗰下，螺絲批突然變粗變大。

呢樣正正係融合左，紫色公雞體型會變大嘅特性。





可惜，由於啲沙係咁吹埋嚟，根本咩都睇唔清，完全無得瞄準。

射左幾支都射唔中，未能有效咁反擊。