穿越時空，冒充平行世界嘅另一個自己，再去呃佢條女上床: （100）

天色好快就光。

Mike受左傷，需要休養，暫時無法戰鬥，由美國鷹代替佢成為戰力。

好彩嘅係，呢幾日佢地無遇到咩特別勁嘅外星人，不外乎係之前見過嘅四手怪同斧頭怪。

根據美國鷹描述，呢兩隻都只係B級怪物，依靠住佢手上操控嘅外星人同埋烈焰炮，都算係成功抵禦左。

而張醫生每日都會幫Mike換藥，傷口康復進度良好，但係距離徹底痊愈仲要一段日子。





對Mike嚟講，最理想嘅情況梗係等到好返曬先再戰鬥，然而外星人要嚟搞你係唔會擇日。

呢一日，就出現左一隻好犀利嘅A級外星人。

「咚隆！嘭！」

喺羽毛球場館周圍，傳出連續嘅倒冧聲及地下爆裂嘅震動聲。

聽到咁嘅聲，Mike佢地知道一定係有外星人出現。





美國鷹反應最快，揦齊架撐，拖埋幾隻外星人行出門口，其他人則緊隨其後。

佢地第一眼發現唔到任何外星人嘅身影，只睇見大約三十米外處，地下有個好大嘅坑洞。

仲有，附近嘅建築全部冧曬，變成廢墟。

頭先明明聽到聲，出到嚟突然靜左，反而令人更不安。

三秒之後，一個拎住巨型錘仔嘅外星人，從個坑下面跳上嚟。





Mike第一時間問美國鷹：「呢隻係咩料？」

「Hammer Beast，大錘獸，A級外星怪物，佢手上嘅錘仔可以擊出百萬噸力。」

「A級？咁咪仲勁過嗰隻鐵馬騮？」

美國鷹點點頭，第一次見到A級怪物，佢個心都有啲怯。

大錘獸嘅形態係本人半獸，左半身好似人，右半身就似袋鼠，肌肉相當膨脹，全身則分佈有大大細細嘅傷痕。

「喂！人類！」

隻怪隨手將錘仔放落地下，已經令地面一震：「有無見過一隻斷左嘅角？」

「下？隻嘢講緊咩角呀？」Mike問美國鷹。





「Er…我都唔知佢講緊乜。」

「喂！有無聽到我講嘢，我問你地有無見過一隻斷左嘅角？」大錘獸再問多次。

「無，無見過。」Mike回答。

「唉！真係煩！揾左咁多日都揾唔到嗰隻死人角，呢度啲又熱又濕，都唔知仲要留喺度幾耐！」

大錘獸喺自言自語，跟住睄到美國鷹手上嘅烈焰炮：「嗯？嗰隻馬騮支炮居然喺你地手上？打得贏隻馬騮，咁睇嚟你地應該都有返幾道散手喎。」

「咁就啱啦，喺度咁多日真係悶都悶死人，不如你地就幫我解悶下啦！」大錘獸伸展四肢，準備想郁手。

一見對方有動靜，Mike佢地條件反射式退後幾步。





「你地要輪流上定係一齊上，悉隨尊便！」大錘獸舉起武器，狠狠咁揼落地下。

「咚隆！」

巨形錘仔撼落地下，不單止引致劇烈狂震，地面更是崩裂。

Mike等人快速調頭逃跑，下一秒，地下裂開一個接近十米咁闊嘅大坑。

好在走得算快，否則佢地隨時跌落去個坑度。

大敵當前，儘管傷患未愈，但Mike都要出手同美國鷹，對付隻外星人。

「快！大家有咁遠匿咁遠！呢度交俾我同美國鷹！」Mike將天上白雲吸收成為保護甲，並召喚出長劍。

張醫生、子瑜、阿鬼同三個女仔繼續退後。