穿越時空，冒充平行世界嘅另一個自己，再去呃佢條女上床: （98）

敵人舉起手，準備想發炮。

就算雙臂劇痛，Mike亦只有執起長劍，正面對抗，心入面有啲後悔幫左摩迪加。

「長毛怪！冰水攻擊！」美國鷹嗌出心中嘅指令。

下一秒，長毛怪口中發射出水炮。

凍水淋落高溫嘅鋼鐵上，發出「jaja聲」，鐵馬騮全身蒸發出白色嘅水蒸氣。





緊急關頭，好在美國鷹及時記起，隻長毛怪係識得射水。

俾啲凍水猛咁淋，隻鐵馬騮無曬「火氣」，熱力被徹底削弱。

「Mike ！出招啦！」美國鷹大嗌。

Mike強忍痛楚，瘋狂揮劍猛擊。

鐵馬騮再射出嚟嘅炮火同光波，已經變得好弱，Mike可以盡情咁近距離劈殺。





「鏘！鏘！鏘！」

長劍一下又一下，將敵人個身劈到逐忽裂開。

最後，Mike用盡全力，把劍一橫，切斷鐵馬騮個頭。

「Boom！」

倒地後，鐵馬騮全身爆炸，化成廢鐵。





「Yeah！好嘢！」Vincy、阿蚊同Suki見到Mike打贏左，開心得拍手大嗌。

敵人終於被解決，Mike放開把劍，灼傷嘅雙手痛得不自控咁顫抖。

診所雖然已經倒塌，不過張醫生連同Suki三個女仔，落手落腳咁喺廢墟中揾藥水同膠布。

子瑜抱住摩迪加行過嚟，見到Mike手臂甩曬皮，都feel對方嗰種痛。

摩迪加就話：「真係渣！打隻咁嘅茄哩啡都搞成咁。」

「咪又係因為幫你，家下你個仇家就香左，咁你係咪應該遵守承諾，幫我地穿越離開呢個時空？」Mike問。

「首先，本大爺多謝你幫手解決左隻嘢，其次就講聲唔好意思，本大爺根本唔識咩穿越，由始至終只係一個大話，講嚟呃你地幫我對付隻嘢。」摩迪加講出真相，承認自己唔識穿越。

「咩話！你呃鳩我地？」Mike情緒激動，好想捏死隻嘢，但雙手已經痛到舉唔起。





「你放心啦，本大爺爭你呢個人情，我一定會還！」摩迪加實牙實齒咁講。

「話左架啦，喺我印象中，摩迪加根本就無穿越能力。」美國鷹拖住兩隻外星人，拎住一碌鋼炮行埋嚟。

呢支炮正是鐵馬騮嘅烈焰炮。

美國鷹覺得好神奇，打完隻怪居然仲有得執裝備，佢以前玩嗰隻格鬥game都無呢啲嘢。

過左一陣，張醫生同三個女仔揾到所需醫療用品，就行過嚟幫Mike消毒傷口，以及包紮。

傷口灼痛，痛到Mike揦埋口面、

子瑜見到Mike咁樣，覺得有啲自責。





頭先係佢叫Mike信摩迪加一次，結果俾死人熊仔呃左，仲間接令到對方受傷。

至於從頭先到依家，乜都幫唔到手嘅阿鬼，不禁獨自慨歎：「唉頂，呢度本來最型就係我，點知俾你地一個個搶曬風頭，真係好唔型！」

「得啦，你係負責探路架嘛。」美國鷹回答佢話。

由於診所已經被摧毀，佢地咁多人要再揾地方落腳。

等到Mike包紮完成後，眾人就重新出發。

俾摩迪加昆左一次，Mike條氣有啲唔順，因此佢決定揼低隻熊啤啤：「你條友講大話，而且留你喺身邊又無用，反而會招致危險，所以就唔帶你走。」

「本大爺咪講左對唔住囉，你唔係咁小氣下話？」

「係囉，我都想親眼睇下摩迪加嘅真正形態。」美國鷹幫口。





Mike回應話：「我地唔知佢毀滅左幾多星球，一共有幾多仇家，仲帶住佢嗰話，咁我地會有危險。」

「咁你又有道理嘅。」美國鷹表示理解。

其他人都無乜意見，於是，雙手包到好似木乃伊咁嘅Mike，就將隻熊啤啤放喺路邊。

「本大爺不嬲係獨來獨往，你以為我無左你地...」

摩迪加嘅說話慢慢淡出，Mike等人亦漸漸走遠。