穿越時空，冒充平行世界嘅另一個自己，再去呃佢條女上床: （95）

原來成件事又係外星人搞鬼。

外面有一隻外星人，對住外墻，不斷射出奇怪嘅圓圈光波，令診所變「焗爐」。

美國鷹一見外星人，就滔滔不絕：「Wow！Iron Monkey鐵馬騮，B+ level，佢雙手可以發出高熱嘅電磁波，仲有烈焰炮。」

正如佢所講，外星人嘅外形猶如一隻鋼鐵製成嘅馬騮，而體型上就比起普通馬騮大隻，足足有一個成年人咁高。

佢雙手係兩支口徑好大嘅大炮，估計就係佢嘅武器。





出現新嘅敵人，Mike心諗自己都難逃一戰。

鐵馬騮卻收起佢啲電磁波，亦都無對班地球人出手，佢只係吹左下口哨，叫左匿喺遠處兩隻外星怪物出嚟。

一隻全身毛神神，一隻就全身液體狀。

三隻怪物um um尋尋，唔知喺度傾乜。

敵不動我不動，未搞清情況，Mike唔想貿貿然主動出手。





佢問美國鷹：「嗰兩隻又係咩來頭？」

「無記錯應該係普通料，大概C級妖怪嘅level。」

「adskngk…Mordica…dakngi…」鐵馬騮對住Mike佢地講。

「隻嘢講咩？」Mike問美國鷹。

「外星話嚟架喎，完全聽唔明，不過有一句，好似提到左魔迪加個名。」





「魔迪加？唔通隻嘢係嚟揾魔迪加？」

Mike見到外星人之間互抽，鐵馬騮無對佢地作出任何攻擊，諗緊對方嘅目標可能只係魔迪加。

跟住，鐵馬騮轉返中文頻道解釋返：「呢兩隻怪物話，啱先見到摩迪加喺度，我想問你地，知唔知隻嘢喺邊？」

原來真係嚟揾摩迪加。

「既然係咁，咁你唔好攻擊我地，我依家去帶佢出嚟。」Mike將iPod同秘笈交俾子瑜保管，然後行返入去診所。

「頂！你班友居然走左去唔理本大爺！辣到我屎忽都熟啦！」被放置喺櫈上嘅魔迪加投訴。

「出面有隻外星人揾你。」Mike抱住熊啤啤行返出口。

佢啱踏出門口，身後成間診所就冧左。





建築結構已被高溫熱力破壞，導致左倒塌。

好在Mike行快一步，先避過一劫。

鐵馬騮一見到Mike攞隻熊公仔出嚟，就露出兇狠嘅表情：「aksdngidaa…Mordica!」

「呢隻馬騮話嚟揾你尋仇喎。」Mike同魔迪加講。

「憨鳩！本大爺見都未見呢隻嘢！關我鬼事！」

「Mordica…sdakgidakng…dkknag…」 鐵馬騮全身散發出高溫，嚇到身邊兩隻怪物匿埋一邊。

「喂！你嘅目標係佢呀嘛？」Mike舉起熊啤啤問鐵馬騮。





「無錯！我係嚟揾摩迪加報仇，其他人唔關事，精精地快啲行開！」鐵馬騮摩拳擦掌。

「你聽到啦，人地講到明揾你報仇。」

「癡線！你隻死馬騮，邊位呀你？本大爺唔識你架喎！」

「五百年前，你嚟到我地星球，殺曬全個星球嘅人！」

鐵馬騮恨得咬牙切齒：「你唔好以為你變成咁嘅樣，我就唔認得你，你嗰股殺氣化左灰我都認得出，今日我就要為我死去嘅同伴報仇！」

「原來你殺左人全族。」Mike對摩迪加講。

「唓！弱肉強食，唔征服返幾個星球，本大爺點起朵做宇宙之王？而且星球之間嘅互相殺戮，本身就好常見。」摩迪加並唔覺得自己有錯。