穿越時空，冒充平行世界嘅另一個自己，再去呃佢條女上床: （94）

開左個會，咩實質嘢都無討論到，散會後，美國鷹仲係咁lur住Mike，求講多啲外星人嘅俾佢聽。

Mike覺得條友好鬼煩，行到邊就跟到邊。

實在頂唔順，佢扮去廁所，用假身fake條友，然後調頭衝入自己間房。

「嘩！你條鹹濕佬做咩入嚟我間房呀！」

Mike一時無為意，入錯子瑜間房。





「洗唔洗咁緊張，你又唔係無著衫。」Mike鎖埋道門，以免俾條煩膠入嚟。

「你仲鎖埋門，想點呀你？」子瑜雙手交叉胸前。

「你真係當我色狼咩？嗰條美國佬好煩，借嚟匿一陣啦。」

Mike坐到子瑜床邊隔籬，睄到對方手上拎住iPod Classic：「咦！點解我部iPod喺你度嘅？」

「之前你同占士、Lulu打嗰陣，唔小心跌左出嚟，我幫你執返架。」





「執左又會唔還？定係你有心偷左？」Mike立即從對方手上攞返部機。

「食啦你，我點會無啦啦偷你部機？頭先啲外星人一隻接一隻，又遇到其他時空嘅你，咁多嘢發生，搞到我一時唔記得還啫。」

Mike仔細檢查一輪，部機表面無花到。

「話時話，點解部機上面刻住『Champion』嘅？係咪你贏左啲咩比賽嘅獎品嚟？」子瑜問。

「唔關你事。」





Mike塞一隻耳機聽下，發現部機無左聲：「咦喂！點解部機無聲出嘅？」

「無理由，我頭先聽過下，都有聲架喎。」子瑜將另一邊耳機塞入耳仔。

「你自己睇下，部機家下播緊歌，但一啲聲都無。」Mike指住個mon。

「係喎，奇怪啦，點解無聲嘅？」

「頂！有無搞錯，一定係你亂逗過部機啦！」Mike好炆憎。

呢部機係佢當年喺游水比賽攞左冠軍，所贏返嚟嘅獎品。

對佢嚟講，部iPod就同塊獎牌一樣，印證住佢人生唯一輝煌過嘅時刻。

因此雖然過左咁多年，但係佢一直都將部機保留住，而且每年都洗錢去維修保養，先至Keep得部機咁好。





之後子瑜㩒一㩒部機嘅音量掣：「哦~原來只係mute左聲啫。」

聽到iPod又播返歌，Mike先安落返曬。

「這晚 要與你做個濕濕的夢 （濕濕的夢）
與你 去創造這深深的痛 （深深的痛）
這次 要跌入你黑黑的洞 （黑黑的洞）
……」

有返聲嘅iPod，播緊 My little Airport 嘅濕濕的夢。

呢一刻，佢地兩個一人戴住一邊耳機，聽住帶性暗示嘅歌詞，氣氛一下變得奇怪。

子瑜除低耳機，塊面變得紅卜卜：「果然係鹹濕仔，聽啲歌都係鹹鹹濕濕。」





「邊度鹹濕，係你諗多左啫。」Mike把口係咁講，但聽住歌詞，卻忍唔住心邪偷笑。

「咁你仲想匿幾耐？」

「匿多一陣啦。」

過左一陣，Mike額頭出汗，個身覺得有啲㷫：「係啦，你覺唔覺間房突然好似好熱咁？」

「警告你，你唔好借啲意想除衫喎。」子瑜雙手再交叉胸前。

「我講認真架，你feel唔到咩，呢度啲溫度感覺越嚟越高。」Mike背脊同額頭都猛標汗。

「俾你講一講，好似又真係好熱咁，會唔會係冷氣壞左？」子瑜都開始滴汗。





慢慢四面墻㷫到出煙，間房焗到好似桑拿咁，子瑜放喺檯面嘅朱古力，統統都融曬。

佢兩個發覺越嚟越唔對路，拿拿臨就開門出去。

個門柄都熱到飛起，Mike開門嗰下辣親隻手。

原來唔單止喺佢地間房，係成間診所都熱到出煙。

連本來暈左嘅Vincy、阿蚊、Suki，都熱到醒返。

室內溫度出奇地高，佢地全部人就嚟中暑咁滯，情況好唔妥，於是各自擸齊自己嘢，好似走難咁跑出門口。