穿越時空，冒充平行世界嘅另一個自己，再去呃佢條女上床: （62）

※ ※ ※


除左「爆裂旋風」外，Mike喺iPod Classic嘅playlist裡面，揾多兩首歌嘅歌名，拼落去閃電技同鋼鐵拳度，作為招式名。

「Mike！我地遇到外星人襲擊！請求你支援！」

突然間，褲袋嘅對講機傳嚟阿榮嘅呼救聲。

喺分開行動之前，阿榮分配左兩部對講機會俾子瑜同Mike，就係要嚟喺遇到危險時，俾大家求救。





「係，收到，你地依家位置喺邊？」Mike對住對講機問。

「我地…我地依家喺蕪湖街！」

「好，我依家過嚟！」

子瑜抽住兩大袋嘢，慢慢行喺Mike嘅後面：「頂你，你係咪男人嚟架，要我一個女仔拎曬咁多嘢！」

「阿榮佢地遇到外星人襲擊，我地要去幫手！」





「喂喂喂，咁你都幫手拎下嘢先得架！」

阿榮話佢地喺蕪湖街，對Mike嚟講，如果係自己嘅時空，咁佢就知條街喺紅磡邊個位。

問題就係，呢度並非佢熟悉嘅香港，四周圍嘅環境同佢認識嘅有天淵之別。

呢度啲街長路闊，十字路口多，環境雖然偏市區，但都係被啲工廠包圍住。

Mike感到迷失，用對講機問阿榮準確位置，但對方卻無回音。





好在咁啱喺附近聽到開槍嘅聲，於是佢同子瑜順住睇聲去揾。

嚟到一個停車場，有五隻鐮刀怪正圍攻緊阿榮佢地五個。

Mike無數錯，真係出現左五隻鐮刀怪。

三個𡃁仔受傷倒地，阿榮同占士就企一架Van仔車頂，被五隻怪物包圍，情況岌岌可危。

「爆裂旋風！」

Mike嗌出招式名，發射出勁力旋風，先消滅一隻鐮刀怪。

另外四隻怪見到同伴被殺，憤怒咆哮，一齊揮舞鐮刀，衝向Mike攻擊。





其中兩隻跑到半路，突然向上跳起，想嚟招高空劈斬。

Mike朝半空射出旋風，可惜全被敵人用鐮刀臂擋下。

四把鋒利嘅鐮刀斬落嚟，Mike側身避開，再順勢揮出一下重重嘅勾拳。

鋼鐵之拳由下而上重擊鐮刀怪個下巴，打到佢飛去無雷公咁遠。

另一隻怪不甘示弱，埋身攻擊，Mike今次無避開，食住個勢打出直拳。

拳頭喺心口入，然後喺背脊出。

綠色鮮血從傷口不斷噴出，敵人應聲倒地。

「呢招就係Kolor嘅『鐵拳之道』。」Mike掹返染上綠色血嘅拳頭出嚟。





面前只剩返兩隻鐮刀怪，Mike乘勝追擊，使出強勁嘅閃電進擊：「雷公！劈友！除世害！」

十道如利劍一樣嘅雷電，閃耀著光芒，以極快嘅速度電殺兩怪。

雷公劈友除世害 呢首歌由黃秋生主唱，1996年收錄在專輯《地踎搖滾》之中。

五隻怪物被解決後，阿榮同占士由車頂落返地下。

至於三個𡃁仔傷勢頗嚴重，手腳、膊頭分別都傷左傷。

Mike、阿榮同占士慢慢抬佢地上車，並用阿榮剛才揾到嘅醫療物資，為三人嘅傷口消毒、包紮。

「救命啊！救命啊！」





忽然間，車外傳嚟一陣高聲呼救。

從車頭玻璃望去，前面有兩男三女正俾一隻外星怪物追殺緊。

又係一隻前所未見嘅怪物。

離遠咁望，隻嘢仿佛一個有四隻手嘅巨型黑色鞋盒。

「Mike，佢三個有我地睇住得啦，你快啲出去救嗰幾個人啦！」阿榮對Mike講。