穿越時空，冒充平行世界嘅另一個自己，再去呃佢條女上床: （60）

苦戰左接近半個鐘，Mike滿頭大汗，返入工廠後，繼續食佢未食完嘅通粉早餐。

阿榮拎左啲螺絲批、士巴拿及其他零件，修理返佢受傷嘅手臂。

Mike望住阿榮隻機械臂，想問又唔敢問。

到食完通粉，再猶豫多一陣，正想開口嘅時候，阿榮搶先一步對佢講：「頭先你出招好似有啲慢，如果快少少，咁就無機會俾隻雞復活多次」

「係，啱先真係慢左。」





正如剛才所講，Mike每次要回想返個出招畫面，咁先chok到招技出嚟。

假如以後招數越嚟越多，無理由要逐招逐個畫面慢慢去諗，咁會好曬時間。

所以佢要諗辦法解決呢個問題。

其中一個佢好快諗到嘅方法，就係聯想法。

即係幫啲招式改個名，只要一諗到個招式名，自然就立即聯想起出招畫面。





「英勇MIke」幫過招閃電技改名，Mike覺得個名太過中二病，有種小學生玩online game，幫角色改名嗰種feel。

問題係霎時間要佢自己改名，佢又唔識得點改。

通常卡通片或者武俠小說，啲人一出招就已經嗌得出招式名，好少話自己幫嗰招改名。

嗰三招到底叫咩名好呢？Mike為此陷入深思。

食完早餐之後，阿榮如常召集大家出去外面，搜救生還者、揾食物，仲有揾醫療物資。





啱先有個中年大叔受左傷，加上其他舊傷者都需要藥物更換，所以要補充醫療用品。

臨出發前，子瑜都話跟埋嚟，佢話想幫大家手，實情真正嘅原因係佢想去外面，搜索有無時空裂縫出現。

六人加多一個，一共七個人一齊出發。

阿榮今日再駛得遠啲，嚟到偏似係市區嘅地方。

為左節省時間，落車之後，佢地分頭行事，一隊負責揾醫療物資，另一隊就揾食物。

Mike有神功護體，一個人帶住子瑜，遇到外星人嘅話，應該都夠對付。

阿榮就同另外幾人組成一隊，去找尋醫療物資。

子瑜同Mike並排而行，一個就口噏噏諗緊招式名，一個就望住偵測裝置，揾緊時空裂縫。





兩個人都無留神，經過一間超市都無察覺。

「喂，你一路喺度口噏噏，到底喺度噏咩啫？」子瑜問Mike。

「唔好嘈啦，我度緊招式名呀。」

「我睇你依家入戲入得好深，當正左自己喺呢個時空嘅Mike，你係咪諗住唔返去自己嘅時空，想留喺度打敗全部外星人為止？」

Mike無否定子瑜嘅講法，佢都知自己最近打外星人投入得滯，幾乎忘記左自己並唔屬於呢個時空。

「哈！唔出聲，即係俾我講中左啦！」

Mike詐詐諦話：「無喎，我頭先都無聽你講嘢，淨係諗緊點改招式名。」





「唓，洗鬼諗咁耐咩，你招旋風技叫『爆裂旋風』咪得囉！至於其他兩招我都未諗到，諗到再話你聽。」子瑜隨口噏。

「爆裂旋風？好似係歌名嚟架喎。」

「有咩問題？邊個話歌名唔可以做招式名？」

「係喎！直接搬啲歌名拎用咪得！咁咪唔洗自己諗！」

俾子瑜一言驚醒，Mike攞部iPod Classic出嚟，決定喺千幾首歌入面，抽取啲歌名用作招式名。