穿越時空，冒充平行世界嘅另一個自己，再去呃佢條女上床: （52）

阿榮開住架車，先喺附近搜索有無生還者。

一路上，Mike不時望出車外，馬路上嘅路牌都係佢熟悉嘅街道名，例如係天光道、馬頭圍道等等。

照道理，呢度應該係土瓜灣，問題係呢附近主要嘅建築都係工廠，住宅、超市呢啲都唔多見，好似入左工業邨咁，完全唔係Mike熟悉嗰個土瓜灣。

回想第一次穿越嘅經驗，當時去左美國統治嘅世界，嗰度嘅土瓜灣好西化，Mike借此推斷，呢一個香港可能因某啲原因，變成左工業重鎮。

而佢呢個判斷並無錯。





呢一個時空嘅香港，的而且確係一個工業城市。

眾所周知，自中國改革開放，香港嘅工業就往北移，但呢個時空則係一個中國無改革開放嘅時空。

另外，當年英國戴卓爾夫人減少國家補助、鼓勵企業私有化嘅政策，間接削弱英國本土工業發展，亦令到唔少商人選擇過嚟香港開廠，為香港嘅工業發展打下根基。

可惜受到外星人破壞，眼前有一部分工廠都變左頹垣敗瓦。

琴日三個𡃁仔喺間食品加工廠揾到食物，今日間廠都變成左廢墟。





阿榮再駛遠少少，揾下有無超市或者食品廠。

一路上佢都駕駛得好小心，因為稍不留神隨時會跌落去，馬路上嗰啲大窿或者大坑度。

揾左一陣，佢地揾到一間超市。

落到車，準備要行入去之際，突然一隻怪物喺門口衝出嚟，嚇到佢地即刻退後。

又係一隻Mike從來未見過嘅怪物。





「係八爪魚怪，我地快啲上車走！」阿榮帶頭跑去停喺馬路中心嘅吉普車。

話係八爪魚怪，但其實怪物個樣並唔完全係八爪魚。

首先隻嘢體型相當龐大，上半身似係一棵擘大口嘅捕蠅草，下半身就有八隻八爪魚腳。

雖然係第一次遇到隻怪物，但Mike卻有隻嘢好熟面口，好似喺邊度見過咁。

「Mike！仲呆喺度做咩？」阿榮佢地已經跑到車前，準備打開車門。

突然之間，八爪魚怪嘅血盤大口，捲起一道強勁嘅吸力，企圖將六人吸入口。

阿榮同占士反應最快，第一時間跑去捉住馬路嘅燈柱，而三個𡃁仔就分別捉實車頭同車身。

Mike就毫無防備，一下子俾股吸力扯到訓低。





好在跌低嗰陣，佢即時攬住路邊紅色嘅消防，咁先無俾怪物吸左入口度。

「大家捉實啲！唔好放手！」阿榮大聲提醒大家。

八爪魚怪口中發出嘅吸力非常強大，六人啲頭髮飛起曬，街邊嘅垃圾桶以及屍體統統都俾吸走。