穿越時空，冒充平行世界嘅另一個自己，再去呃佢條女上床: （43）

阿榮聽完，笑左出聲：「想整蠱我都揾第二樣啦，你點會唔係Mike啊？我識你咁耐，唔通你係邊個我會睇唔出咩！」

「咪就係囉，咩平行時空咁天馬行空嘅嘢都講得出，阿Mike你真係幽默，哈哈哈！」占士都笑埋一份。

「我唔係講笑，子瑜可以做證架...」Mike叫子瑜幫手解釋。

「Shh！」阿榮突然剎車，指向遠處街口轉角位，示意嗰度有外星人，「大家唔好出聲！」

Mike同子瑜嘅目光，一齊投向阿榮指住前面嘅嗰個位置。





無錯，真係有外星人，但係個樣同啱先見到嗰隻綠色怪物完全唔同。

前面嘅外星人身材矮小，無眼無鼻只得一個倒三角嘅嘴巴，全身灰銀色，心口有一個好似超人迪加嘅菱形藍燈。

佢地數量仲唔少，起碼有七八隻，而且全部都雙腳唔掂地，就咁漂浮喺半空。

Mike嚇到呆左，心諗唔係呀嘛，啲外星人居然仲有其他品種？

四人伏低，一直等到嗰幾隻外星人走左，阿榮先至繼續開車。





架車轉彎嚟到一個食品加工廠門口，阿榮吹左兩下口哨，隨即有三個年約十三、四歲嘅𡃁仔，拎住一袋袋嘢行出嚟，再行上車。

阿榮指住Mike，問三個𡃁仔：「你地認唔認得呢個係邊個？」

「Mike哥哥囉。」三個𡃁仔諗都唔諗就一齊回答。

「個個一認就認得出，點扮都扮唔到架啦Mike。」阿榮笑一笑，完全唔信對方係由另一個平行時空穿越到此。

「喂，你幫手解釋下啦。」Mike細細聲對坐喺隔籬嘅子瑜講。





「下？你同我講緊嘢？」子瑜只顧低頭望住部探測儀器，搜索緊附近有無時空裂縫。

Mike問對方：「你喺度睇緊咩？睇到入曬神咁，部時光機都爛左，就算你拎部偵測儀器出嚟，都無用架啦。」

「咪嘈住啦，我揾緊有無時空裂縫。」

「時空裂縫？你講緊咩？」Mike問。

子瑜掛住睇部偵測儀器，無理會Mike嘅問題。

而Mike心入面覺得好出奇，明明子瑜都無時光機，對方係點樣嚟到呢個時空？

「到啦，大家可以落車啦。」阿榮將架車停喺一間工廠前嘅空地。

間工廠佔地大約五個七人硬地足球場咁大，兩層高，外圍墻身暗沉灰白，俾人一種死氣沉沉嘅感覺。





呢度地方隱蔽，周圍又俾幾間廠圍住，所以一般唔容易俾人發現，算係一個藏身嘅好地點。

Mike同子瑜跟住阿榮佢地，慢慢行入工廠。