穿越時空，冒充平行世界嘅另一個自己，再去呃佢條女上床: （16）

「我可以就咁留喺車房呢度，唔入去間屋都得架。」Mike一邊請求，一邊撥開對方隻手。

「No！呢度唔歡迎你！」

雙方又開始推推撞撞，期間Mike一下用力過猛，將對方推落去靠墻嘅木架度。

「另一個Mike」嘅背脊撞落木架度，導致放喺最高層嘅士巴拿跌落嚟，直接擲中佢頭頂，堂當再次暈低。

諗唔到居然咁又過到骨，Mike鬆一口氣，並將對方拖返去車尾。





佢喺對方身上摷左部電話出嚟，然後先行返出去。

Jenny聽到有聲，行埋嚟睇下咩事。

「Nothing nothing…」Mike猛話無事發生。

Jenny有啲好奇，想入去車庫𥄫下，Mike就拉走對方，仲叉開話題，話自己好肚餓：「Jenny, I’m very very hungry, dinner ready？」

條友為左增加逼真嘅效果，特登扮左啲美國口音出嚟，雖然一啲都唔似。





Jenny聽「老公」話，收起好奇心，去廚房煮晚飯。

Mike啱啱喺另一個自己身上擸左部電話，等緊開飯嗰陣，佢坐喺客廳嘅梳化，用部電話查啲嘢。

部電話有臉部解鎖功能，佢對一對個熒幕就輕易解鎖部機。

首先佢影低部時空裝置個樣，再用圖片搜尋嘅方法，查下有無部機相關資料。

顯示出嘅搜尋結果，來來去去就只有關於iPod Classic嘅網頁，似乎網上無任何關於呢部時空裝置嘅記載。





隨後Mike搜索一下二戰嘅資料，發現真如「另一個Mike」所講，二戰之後美國吞併左日本，繼而逐步統一天下。

「叮！」

電話突然響起一聲短訊提示音。

有個人send左條訊息過嚟，名稱顯示係一個蜜桃emoji，無任何圖片，訊息內容係「I miss you」附帶一個心心圖案。

Mike直接無視，並無回覆。

過左一陣，Jenny煮好左晚餐。

佢煎左兩塊牛扒同煮左一兜意粉，賣相望落唔錯。

Mike坐去飯廳，同對方一齊食晚飯。





成餐飯落嚟，Mike都無乜點出聲，因為佢知自己英文麻麻，費事講多錯多。

Jenny覺得自己「老公」全日都神神化化，十問九唔應，仲好似心事重重咁。

仲有佢好想知今朝發生咩事，點解「老公」會淋雨淋到濕曬咁狼狽，同埋做乜無端端換左衫。

因此食完飯、沖完涼，準備訓教嗰陣，Jenny嘗試開解滿懷心事嘅「老公」。