穿越時空，冒充平行世界嘅另一個自己，再去呃佢條女上床: （15）

「汪汪！汪汪！」

啱啱食飽，嗰隻討厭嘅金毛狗又試出現。

「頂你隻衰狗，快啲走開！」

Mike擸起檯面嗰本又厚又重嘅書，攀隻狗走。

佢揸住本書當武器，期間一個唔小心甩手，成本書飛左出去，仲整爛左入面其中幾頁紙。





本書「砰」一聲撼落墻上，成功嚇走左隻狗。

佢閂返埋度門，跟手拿拿臨將爛左嗰幾頁攝返入去，再擺返本書喺原位當無嘢發生。

其中有一頁被佢撕爛嘅版面，上面印住一個奇怪嘅圖案，望落似係一棵生左八隻八爪魚腳嘅捕蠅草。

喺不久嘅將來，Mike將會親身遇上呢隻怪物。

眨下眼太陽落山，個天入夜變黑。





Mike一直匿喺書房，插住耳機聽住歌，埋頭研究點樣開返著部時空裝置。

無可奈何，研究左一輪，都係一無所獲。

佢開始擔心，好驚自己呢一世都要留喺度，返唔到屋企。

「唉…」佢無奈歎氣，跟住醒起「另一個Mike」昏迷左好耐，到家下都仲未醒。

佢收返兩部機入褲袋，不動聲色咁落樓下，去睇睇對方咩情況。





入到車庫，只見「另一個Mike」倒臥喺地下，昏迷未醒。

Mike一方面唔想對方咁快醒，因為對方一醒左，肯定會攀自己走，另一個方面又怕對方有咩不測，畢竟對方個頭撼左落倒後鏡度，嚴重起上嚟有可能腦震蕩。

突然呢個時候，「另一個Mike」擘大眼扎醒左。

Mike嚇到個心離一離：「你…你…醒左啦？」

「另一個Mike」一隻手掩住個頭，另一隻手捉住Mike，雙眼怒睥：「You son of a bitch！你究竟係咩人？點解闖入嚟我屋企？ 」

「講出嚟你可能唔信，其實我自己都唔信，亦都唔肯定，但我諗我唔小心穿越左，由本來嘅時空穿梭嚟左呢一個平行時空。」Mike答話。

「平行時空？Are you kidding me？」

「我知係好不可思議，但我真係同你一樣，個名都係叫Mike，外貌、身高亦完全相同，而且我都係住土瓜灣，不過我所認識土瓜灣同呢度好唔同，呢度無論係建築定係環境都好西化，感覺好似去左美國咁。」





「因為呢度就係美國，第二次世界大戰之後，美國統治左全世界，包括香港。」

「下？乜原來係咁呀！咁即係話，呢一個係美國統治世界嘅時空，唔怪得連世界地圖都改左名！」Mike卒之搞清楚呢一個平行時空嘅時代背景。

「另一個Mike」企返起身，雙手掹住Mike嘅衫領：「All right, Let’s cut the bullshit！我唔理你係咩人，喺邊度嚟都好，總之我屋企就唔歡迎你！Now you get the fuck out！」

「唔好啦，家陣我返唔到去自己嘅時空，你可唔可以暫時收留我？」Mike捉住對方雙手哀求。

「No way！我係唔會隨便收留陌生人！」

「雖然我地係兩個唔同時空嘅人，但話曬大家都係叫Mike，點計都係有啲挐掕（啦能），你唔係見死不救呀嘛？」

「好！既然你唔肯走，咁咪怪我唔客氣！」





講完，「另一個mike」就動粗，企圖用武力攀對方走。