我同離家出走嘅有錢仔合謀扮拍拖: 二

睇在隻錶…唔係，係睇在個男人咁可憐嘅份上，我決定煮少少嘢俾佢食。
我開燈，行向廚房。
入廚房之前，我擰轉頭望咗望啱啱行入餐廳嘅男人。佢只係好奇咁環視一周，跟住就神色自若咁行去其中一檯度坐低，冇絲毫嘅唔自在，自然到好似返自己屋企咁。
我思索咗幾秒。收銀機已經鎖好咗，餐廳入面亦都冇其他貴重嘢。
於是我放心咁入咗廚房。

廚房被整理得一絲不苟（我嘅功勞），我好順暢咁經過廚房中央嘅煮食區，行到雪櫃面前。
打開雪櫃，入面有各式各樣嘅材料。我諗咗諗，喺入面攞咗包急凍蜆肉出嚟。
因為最平。
其實包蜆肉係我哋啲員工嘅，雪櫃入面仲有腸仔呀午餐肉呀呢啲食物，全部都係for我哋自己食，唔會用嚟serve客。





十五分鐘後，我一手攞叉，一手捧住一碟蒜香蜆肉意粉，從廚房裏面走出嚟。
蒜香味飄滿一室，本身只係安靜咁坐喺度嘅男人頓時抬頭望向我，眼中閃爍住渴求嘅光芒。
搞到我以為自己係咩救世主。
我行到佢張檯嘅側邊，輕輕放低手上碟意粉。
個男人佢笑住對我講咗聲「唔該」，然後就攞起叉，迅速咁開始食。
佢食得好快，但並冇一般人極度飢餓時嗰種狼吞虎嚥，反而保留住一種優雅。佢呢種優雅唔係刻意表現，而似係由佢骨子裏散發出嚟。
我好耐冇見過人食嘢食得咁好睇。
就憑佢由入嚟餐廳嗰刻到而家嘅神態，我覺得佢絕對唔係嗰啲遊手好閒嘅白撞友。
睇嚟隻錶好可能係真嘅。我心入面沾沾自喜。





但事實證明，貪心真係會有報應。呢一刻我為咗隻錶有幾開心，之後就有幾後悔。
因為我收咗呢隻錶，呢個男人徹底咁纏住咗我。

一開始佢提出要我收留佢嘅時候，我係直接拒絕嘅。
痴線，三唔識七做乜要俾你住我屋企。正常人都會拒絕啦。我嗰下想直接趕佢出門口。
佢一早知道我會係咁嘅反應，冇表現出任何被拒絕後嘅不快，而係優雅咁微微一笑。
其實佢嘅笑容幾charm，但我竟然起咗一身雞皮。
緊接著，佢溫柔嘅聲音響起：「你偷咗我隻錶，隻錶值三萬幾蚊。我考慮緊報警。」佢講完之後就自己行咗去收銀。
收銀嗰度有電話。




我呆若木雞咁望咗佢幾秒，終於喺佢拎起聽筒嘅時候反應過嚟，一個箭步衝埋去，搶咗佢手上嘅聽筒。個男人冇掙扎，只係挨住收銀台，好整以暇咁望住我。
「你有病㗎？隻錶你自己俾我㗎喎。」我對佢怒目而視。
「我冇喎。」佢表情無辜。
呢一刻我淨係想打佢一鑊。
「我俾返隻錶你。」我強行抑壓怒火，嘗試心平氣和咁同佢溝通。
「犯法就係犯法，俾返我都冇用。」佢仍然係一貫嘅微笑。
喺呢一刻我就知道，呢個人係存心要纏住我。
「其實我都唔想咁，但我而家已經冇屋企返，唯有麻煩你喇。」我已經對佢懶紳士嘅微笑免疫。

最後，我都係帶咗佢返屋企。
一方面係自暴自棄，覺得還掂都撇唔甩佢，不如就由佢啦。另一方面就係因為佢最後講嘅嘢。
「收留我一個月，隻錶就係你㗎喇。」
三萬幾蚊一個月，就算二萬幾放出去，都高過我一個月人工……
我覺得我又ok了。