呢排成日發春夢: 六

我哋呢段關係又繼續維持咗一段時間。
今日係星期日。
「今日得唔得閒？」林景昊突然signal我。其實話突然都唔算突然，我哋差唔多個個星期都會出去。一開始，每次出去都係去開房。但熟咗之後，有時佢搵我係真係約我去玩。
「去邊先。」於是我養成咗事前問清楚佢嘅習慣，因為佢約我嘅目的決定咗我使唔使襯bra同底褲嘅顏色。
之前有次佢約我出去，我以為係出去玩，所以就求其著，點知佢帶咗我去開房......
我永遠唔會忘記嗰次佢望到我個鬆弛熊bra時，想笑又唔敢笑嘅表情。
我唔會俾呢啲事發生第二次。
「我屋企。」好，即係要襯啦。
今次係我第一次去林景昊屋企。
「你坐吖。」一入門口，佢就指我去客廳，佢自己就行入房換衫。「我哋一陣睇Netflix吖，你有咩想睇？」




我先唔信佢叫我過嚟係為咗睇Netflix，於是我直接無視佢問題，問佢：「可唔可以望吓你間房？」
「哦好呀」佢冇特別反應，但佢個表情就好似指控緊我太慾求不滿。
我扮睇唔到佢個表情，跟住佢行去佢房門口。其實我唔完全係因為太緊火先提出要睇佢間房，只係有啲好奇。
而佢間房同想像中差唔多，甚至更整潔。放眼望去，一張偏大嘅單人床貼住房間最裏面嘅牆壁。枕頭、床單同被笠都係同一set嘅深藍色，簡單整齊。床尾有一張書檯，貼住牆壁擺放。檯上面有部MacBook，亦有個筆筒，筆筒入面只有幾枝筆。
好普通嘅一間房，但我望到之後直接呆咗喺原地。
夢入面個男人間房exactly 就係咁嘅樣。就連床嘅顏色、筆筒擺放嘅位置都一模一樣。
「唔入嚟？」林景昊好快換好屋企衫，見我仲企喺房門口，好不解咁望咗我一眼。
我冇答佢，仔細打量佢身上著住嘅衫，同時腦海中不斷回憶返夢境中男人嘅打扮。
淺藍色長袖T恤、黑色長棉褲、黑色拖鞋……我由上而下咁掃視林景昊，個心跳得越嚟越重。
雖然我已經唔記得夢入面個男人嘅樣，但我依稀記得佢著嘅衫。根本同林景昊而家著緊嘅一模一樣！




如果只係著嘅衫一樣都算，問題係連間房都一模一樣……但我好肯定我從來未嚟過呢間房。
我開始起雞皮。雖然好荒謬，但而家發生嘅一切令我不得不作出一個假設：
林景昊就係我夢入面嘅男人。
我開始回想返我哋嘅第一次上床。嗰陣我隱隱覺得個場景有啲熟悉，但我冇深究。
而家諗返，我嗰陣覺得熟悉係因為我喺遇見林景昊之前已經夢見過同佢喺酒店嘅情況。而後來同佢約炮睇戲嗰日突如其來嘅「既視感」可能都係因為之前夢見過。
即係我發嘅春夢係預知夢？！
呢一刻我諗返起遇見林景昊之前嘅最後一個夢。
「不如我哋一齊啦好唔好。」
「你沖完涼就走啦。我之後應該都唔係咁得閒，你有需要嘅話可能要搵過第二個。」
佢嗰陣同我表白，而我拒絕咗佢。




如果我發嘅夢係真，係咪即係代表現實中嘅林景昊都會同我表白？
「喂，」我思考得入神，冇留意林景昊已經行咗出嚟。「你諗咩諗到面色咁難睇呀？」佢企喺我面前，關切咁望住我。
「冇，有啲肚餓啫。」我心神恍惚，求其搵咗個藉口敷衍佢。
「得，咁你坐低，」佢拉咗我出廳，然後㩒住我膊頭壓到我坐落張梳化度，「我去廚房煮個麵俾你。」
我望住佢行入廚房嘅背影，心緒不寧。
究竟林景昊有冇發過同我一樣嘅夢呢？佢知唔知道之後發生嘅事？