呢排成日發春夢: 五

自從酒店呢一次之後，我就冇再發過春夢。時間耐咗，夢入面個男人對我嚟講已經好模糊。
可能真係好似我best friend講咁，我發春夢只係因為我冇拍過拖太飢渴。而家生理需要已經被滿足，我自然就唔使再發嗰啲夢。
而我同林景昊喺呢段期間都有約過幾次，每次都係去開房。
又一場大戰完畢，林景昊瞓返落床，平躺住咁望天花板，唔知諗緊乜。
我睄咗佢一眼之後就擰轉面，安靜咁望住一室狼藉。
頭先我哋太緊火，一入到房就開始一邊錫一邊除衫。不遠處嘅地板上，我條裙同佢件裇衫糾纏埋一齊。
身邊嘅人突然開口：「去唔去睇戲。」
我擰返轉望佢。「咁有閒情逸致？」平時我哋都係扑完就沖涼走。
「咁你去唔去吖？」感受到我嘅視線，佢終於施捨個眼神俾我，而唔係望天花板。
唔知點解，我感覺自己好似經歷過呢一幕，即係所謂嘅既視感。




我窒咗窒，但好快又回復正常。
「去囉，不過要食咗飯先。」
我懶得落街，所以林景昊去咗買譚仔上嚟。食完之後我哋一齊去睇戲。
其實套戲一啲都唔好睇，係好悶嘅題材。排隊買飛嘅時候，我仲再三向林景昊確認。
「呢套真係你講嗰套『想睇好耐，但冇人陪你睇』嘅戲？」我就咁睇個名都知會好悶。
「係呀。」佢有一下停頓，「想睇其他呀？你揀囉。」佢又講。
但係我一套都揀唔落手。
我頭先已經望過其他戲嘅名同簡介，全部都好唔吸引。做咩呢排上映嘅戲都咁低質？我有種直接走嘅衝動。
「唔使啦，睇你想睇嗰套。」望到佢帶住期待嘅側面，我都係講唔出掃佢興嘅說話。
但係套戲開始咗一陣，我就後悔自己當初點解要心軟，而唔即刻調頭走。




隔離呢個本身表現到興高采烈、好期待嘅人，睇睇吓就挨咗喺我膊頭，呼吸平緩。
佢瞓着咗。
我好無奈咁嘆一口氣。又係佢自己話好想睇呢套戲嘅，入到嚟又喺度瞓覺……
不過望住佢安靜瞓覺嘅模樣，我最後都係冇叫醒佢。
「轟——」戰爭片嘅炮火聲響起，嚇到佢彈咗一下。
我心入面偷笑。
呢一次好似開咗個先例，後來我哋每次開完房都唔會即刻分別，而係會一齊去街。就算唔去街都起碼食埋飯先走。
我哋嘅相處模式有啲似情侶，雖然我哋實際上並唔係。我唔知咁樣係咪正常。
因為咁，我仲試過上網search「炮友變情侶」之類嘅關鍵字，得出嚟嘅結果通通指向一個結論——
男人大多都做到性愛分離，佢哋唔會愛上自己嘅炮友。




見到呢個結果，我內心深處焦灼不安嘅小小奢望終於一下子冷卻落嚟。
但我唔會覺得可惜，因為我知道我哋最一開始嘅相遇已經錯咗。