[少甜] 《未曾存在的理由：發生喺半套店嘅沉船故事》: 第九章

由細到大住喺新界，返工喺九龍，我對香港島一直只保留到好粗疏嘅印象，叮叮都只係坐過數次。

面向九龍嘅一邊，有由東邊柴灣開始至西邊西營盤嘅路段，可以以地鐵或者電車到達。途中會經過灣仔銅鑼灣人流比較旺嘅地區，中環就係甲級寫字樓嘅集中地；背向九龍嘅一邊係南區同其他郊遊玩樂嘅地方。而今日會去嘅鶴嘴就係屬於後者嘅範圍。

網上面做過功課，進入鶴嘴睇鯨魚骨嘅路程應該屬於簡單嘅路線，唔停留的話，步行來回大約一個半小時。穿着輕便一啲嘅運動衫褲，帶備適量嘅水同毛巾，應該就足夠應付呢段路程。時間係下午兩點三十分，我喺筲箕灣地鐵站嘅A3出口，等待Divya嘅蒞臨。

「喂，膨于硬！」兩點三十四分，Divya雀躍咁喺A3出口嘅下層，大聲呼嗌咁叫我。

「出到嚟唔好叫我膨于硬。」我觀察四周，確保無其他人聽到呢個尷尬嘅網名。



Divya穿著一身適合山中步行嘅運動裝束，白色風褸加上及膝短褲，妝容比起返工時淡一啲，本身短短嘅頭髮再扎喺後面，膊頭背住一個細細嘅背囊。

由於我對佢比較性感嘅印象嚟自於佢返工嘅時候。所以稍為望多咗兩眼，適應一下眼前無咗工具盤嘅佢，就好似重新認識一個人一樣。原來佢著便服嘅時候，都有可愛嘅一面展露出嚟。

「你望夠未啊？咸濕仔！」Divya淘氣咁講。

「無，只係未見過你咁樣著。」我如實回應。

「你講到我唔係着到返工咁性感，就好遺憾啦喎？」Divya繼續追問。



「可能都係㗎。」講吓講吓我都笑埋一份。

「啫係我今日着得唔好睇？」Divya稍為認真咁問。

「只係講笑，我需要啲時間習慣吓，始終我未同過你出街，對你嘅印象只係停留喺返工嗰時。」我回答。

一路寒暄，我哋就一路行去附近嘅巴士站上車。大約二十分鐘左右，就到達咗前往鶴嘴嘅入口。

我哋慢慢沿住鶴嘴嘅方向落斜坡，喺路程之間並冇講到太多嘅說話。Divya行起路上嚟，步伐比一般香港人慢。我意識到要調整自己嘅步速，模仿Divya漫不經心嘅步伐，協調一吓大家嘅速度。抬起頭望向右手邊無止盡嘅海洋同香港島嘅境色，襯托住左手邊連綿不絕嘅雜木林，由於時值秋天，黃葉落到一地上，變成道路嘅一部分。



落車嘅巴士站離我哋越嚟越遠，交通嘅噪音污染都越嚟越細聲，換嚟只有大自然嘅山情水意。喺呢到無仼何嘅道德判斷，無仼何人與人之間嘅磨擦。

太陽偶爾會喺雲層裂縫之間露出，尷尬嘅溫度令我哋兩個都除低外套，綁喺腰中間。閑日嘅關係，沿途並無太多人，彷佛進入咗一個無城市同人群嘅異空間，好似可以不停咁繼續行落去，只知道終點有吸引嘅光景等住我哋去搜索。其他嘅一切就仼由佢遺棄喺現實世界。

不久，路段由一開始嘅單程車路，變成草地。由於開始接近海平面嘅水平，風勢都稍為變得更大，好似提醒我哋即將要到達目的地。亦因為風勢嘅關係，前往嘅路段開始比較吃力，花咗啲力氣先能夠兜過小山丘行到去鶴咀海岸保護區。

三點五十分，見到前方屹立咗香港大學太古海洋科學研究所，根據網上資料，我哋已經到達咗目的地。

「鯨魚骨呢？鯨魚骨放咗喺邊啊？」Divya眼神同我接觸之後，興奮咁問。

「唔好心急，應該就係研究所落少少位置。」我手指指住大概方向。

「知道領隊。」Divya調皮回答。

我示範點樣跨過路障，再扶一扶Divya嘅上身，穩住佢嘅重心，將佢帶過嚟路障嘅另一邊。由於另一邊已經超出研究所範圍，所以再冇人工嘅路段可以前進。



鶴嘴地方雖然唔大，但係一切奇奇怪怪嘅地質特徵都可以喺呢度搵到。據說香港好多年前坐落喺板塊邊緣，火山噴發嘅岩漿曾經湧至附近嘅地殼底層，冷卻同風化後就會形成花崗岩。

而鶴嘴一帶就係由呢種岩石形成，因為近海邊，所以沿途花崗岩伴隨住侵蝕地貌，甚至有海蝕拱橋嘅出現，非常值得一睹。

以前聽過一個笑話：「陽光行咗七分鐘嘅路嚟到地球，竟然被你一個區區嘅人類擋住，而去唔到地面。」

雖然好無聊，但係細想的話，又會發現當中嘅震撼力。曾經人類虛妄以為宇宙嘅星體都係圍住地球而轉。最後發現，原來地球不但只唔係世界嘅中心，宇宙嘅浩大更加係追求唔晒，顯得人類似嘍蟻一般。回頭一睇原來水星未曾逆行過，逆行嘅只有人類嘅自大。

呢種相對於宇宙，渺小嘅虛無感應如何被理解先妥當？我唔知道。不過，我哋倆個就係企喺一個咁有地質歷史意義嘅地方上郊遊。

「喂，諗緊咩入曬神咁樣？」Divya喝咗我一口。

「無啊無啊。你望吓嗰邊！嗰度就係擺放鯨魚骨嘅位置。」我指向右手邊。然後我先起腳，沿住無律可循嘅岩石地貌前進。



「好似比我想像中細好多。」Divya隨後跟過嚟鯨魚骨嘅位置。

「呢到寫住因天竹襲港時受損喎，啫係風球關係早幾年吹爛咗一部分。」我照住水牌讀出。

「我無仼何貶義㗎，同埋就算係咁，都係比我想像中細啊。」Divya略帶笑容繼續講。「同喺越南睇到嘅都唔同嘅。不過算啦，好多謝你今日帶我嚟呢到。要你安排今日嘅呢一切，有冇麻煩到你啊？」

我並無回應Divya嘅問題。其實同只有見過兩次嘅客人出街都太過冒昧啦呱？可能佢同佢男朋友發生咗啲事，想人陪佢散吓心？算啦，都係唔好再有多餘嘅猜測。

「不如留多陣，上去嗰度睇吓。」我指一指向岩石堆積而成嘅小山丘，看似無路段，不過少少攀爬功夫應該可以到達。

「你到時要扶一扶我喎。」Divya回應。

「有需要的話，我幾時都可以扶你。」我回應。

然後沿住可以行嘅石路，緩緩咁攀登上去。