[少甜] 《未曾存在的理由：發生喺半套店嘅沉船故事》: 第三章
我點起咗一支煙。
吸煙係一個唔錯嘅選擇，工作休息時可以有理由圍埋一齊，減少工作上人與人嘅磨擦。吸煙至少為唔同階層嘅人帶嚟少少平等嘅時間，不論你係老闆、管理層、打工仔、工人階級，只要你有吸煙需要，你就要放低身段入嚟後巷。承認自己需要幾分鐘時間緩衝一下生活帶嚟嘅尷尬感，並無例外。
我現正身處大埔墟火車站嘅吸煙區，準備出發去尖沙咀。與其話呢個範圍係吸煙區，倒不如話呢度只係火車站後巷，不過吸煙人士聚集多咗，就約定俗成成為咗吸煙區。
吸一啖煙。
英國讀書時，經常會喺巴士站吸煙而認識到一次性朋友，咩嘢係一次性朋友？就係你成世人都唔會再見到嘅朋友，你哋只係機緣巧合下有一個共處嘅機會，十分鐘嘅緣份後，你哋又會變返陌生人。不過佢哋唔多唔少又會為你帶嚟一啲回憶，例如你哋會閒聊今日嘅天氣，啱傾的話會為對方準備打火機，繼續煙駁煙。最誇張一次，我喺巴士站打開咗隨身攜帶嘅手提電腦，向位一次性朋友介紹我嘅創作。佢興高采烈咁不斷回問各個技術步驟，差一啲就唔願意上車。
呼出煙圈。
就算唔會產生任何好處，人往往會執行一啲看似理性，講求原因嘅行動。其實吸煙識朋友嘅效益非常低，只不過我一心認為結果係咁，願意咁樣相信。背後只在於你當下有冇意思認識朋友，你只係習慣吸煙時打開心扉，其實吸煙同識朋友根本一啲關係都冇，大家亦從來無放低過身段，只係自己覺得兩樣嘢連接一齊時比較容易接受。
只要你願意認識朋友的話，其實仼何時候都可以。
講起做事要有原因，又好似點解我而家會身處後巷吸煙？我只想為殘留古龍水嘅身體上帶一啲煙味，增加成熟感。加上一陣搭火車嘅路段會加以咀嚼香口膠，當到達目的地時，口中嘅煙苦味就會散去，我就會變成一個注意儀容嘅吸煙人士。
其實係好造作，表達我知道吸煙係一個陋習，但細心嘅我知道會影響大家對我嘅觀感，所以先會咀嚼香口膠彌補問題，唔會難為你聞到我口中嘅煙苦味。不過身上散發煙同古龍水混合嘅味道會成為提示，俾你知道我嘅細心同成熟。
呢個就係所謂理性，但無任何效益嘅行動，為嘅只係滿足自己幻想。其實同認識朋友一樣，理由同結果根本無仼何關係，兩者之間無任何連結，亦無需要協調。
腦中閃過女仔喺大廳補妝嘅畫面。
又再到達嗰個暗暗嘅走廊，佢補妝嘅身影喺腦袋入面揮之不去，整個星期我只係不斷諗色情場所同呢個女仔嘅連結點喺邊？究竟嗰一種違和感喺由邊一度散發出嚟。
你有冇聽過「注意呼吸」嘅小遊戲？人嘅思考好奇怪，提及完後，你嘅精神就會不斷留意自己呼吸，直至你忘記呢個指示為止。我個腦就係用類似嘅形式，不斷回想呢段記憶，不斷提自己要搵到嗰個兩者間嘅連結點。好似一日搞唔清楚，就唔會心息一樣。
「係咪約咗我啊？入房沖涼等住先啊靚仔。」今日係嗰個女仔為我開門。
「係啊，好啊好啊。」我帶啲呆滯同未反應得切咁回應。
「維他奶啱飲？」佢打開雪櫃拎起包維他奶問。
「啱啊，唔該。」我從佢手上拎起維他奶。
入房沖涼，預想一下即將發生嘅事，確保自己唔會失禮。另外腦入面不斷回想起Divya個句「Focus on the girl」。既然係心理問題，就當然用返心理層面嘅解決方法。唔知會唔會有效，不過儘管信住先，一陣記得要「Focus on the girl」。
「Hello！我係Candy！」Candy頓然入房向我打招呼。
仔細睇清楚後，發現Candy最吸引係佢淡淡嘅笑容，就好似見到沙灘上嘅足跡，你嘅集中力只會被足跡搶走，而唔會留意到沙灘上其他嘅風景。佢嘅笑容就係有呢一種吸引力，百看不厭。另外佢同鈴村愛理一樣有一對笑眼，喺微笑嘅時候眼睛會微微向下彎，非常可愛。
一輪按摩同交談之後，Candy好細心除底圍喺我身上嘅毛巾，繼而進入佢服務流程。
一切都喺佢掌握之中。
不過腦袋入面不斷迴響「Focus on the girl」。呢句說話就好似「注意呼吸」一樣，當你不斷提自己要專注喺Candy身上，反而會有反效果，你根本無享受過成個過程。淨底只有消費得嚟嘅快感，你自以為買起佢嘅呢段時間同服務，其實你咩都無得到，最終我以半起機狀態解決，結束今次嘅旅程。
沖涼後，仍然有一啲空檔時間，我點起咗支煙，而Candy簡單梳洗後亦都坐咗埋嚟喺床上面傾計。
「你有食煙㗎咩？啱啱Kiss個陣聞唔到嘅？」Candy拎起自己嘅電子煙吸咗一啖，然後問。
「我有啊，不過掩飾得好。」我心入面慶幸，原來「食香口膠保儀容計劃」真正喺幻想以外實踐到。
「我都有㗎，不過怕啲客唔鍾意浸味，轉左食電子煙啦。」Candy又吸咗一啖電子煙。
「其實個秘訣係先咀嚼四粒香口膠，十五分鐘後再補多兩粒，一開頭要用力吸氣，確保香口膠嘅威力可以散落到整個口腔同肺，保持口氣清新。」終於有人留意到我嘅細心，我開心咁分享自己食香口膠嘅心得。
「你可唔可以幫我寫份報告啊？」佢轉開話題，而且根本唔關心點樣實踐「食香口膠保儀容計劃」。
「咩嘢報告啊？」我雖然失望，但保持冷靜咁問。
「喺討論區入面有個地方可以幫我寫報告，講吓你入嚟玩得開唔開心，個流程係點樣，當係幫我宣傳下。」佢雙眼望住我，然後又吸咗啖電子煙。
「你真係想我咁做？」我心入面有啲猶豫，感覺怪怪，係唔係需要跟佢嘅說話做。
「係啊，你幫我寫啦。」佢嗲聲回應，並且挨住我嘅肩膊。
當下我已經無仼何判斷能力，心入面亦都牽強咁加上理由：既然色情場所要有霓虹光管，咁寫報告應該都係協調呢一切事物嘅其中一環。既然係自己能力範圍內，就算係幫人，又或者取悅人，都已經無所謂啦。
就係咁，我哋交換咗聯絡電話，完成咗第一次嘅交易。