《我老婆唔係我女朋友》【那些年／學界比賽／真人】 第四章至六章: 【第六章】 ＥＮＤ ＧＡＭＥ（２）
「原來你識Lulu㗎？」剛排好出場序，大家並排坐在一起，出乎意料竟然由總舵主先帶起話題。
「哦，我上年去聯校舞會識嘅，啱先上個月又喺街撞到，咪熟絡啲囉，你Year 3𠺝，同佢唔同級，又會識嘅。」我梗係扮傻套料先啦。
「我舊年帶佢哋O Camp嘛。呵？你會去『波』嘅，唔似你喎，約Lulu去㗎？」可能我個死人毒隱樣，畀人嘅印象係一世都溝唔到囡，所以偶然有囡出現喺我附近就一律定義為「我條囡」。
故意唔答佢嘅問題先。「喂你做組爸又係嘅，Lulu想練水又唔幫吓人。」一於用有限的情報，亂噏當秘笈。
對仔講嘢我是完全腦清神聰的，只是一對住阿心就成個智障一樣。
「吓，係咩？我完全唔知喎，佢又無搵過我，其實你教佢都得啦。」他露出摸不著頭腦又帶點無辜的表情。
「唏你哋同一間學校嘛，唔係方便啲咩，你哋有無泳會呀、水會之類㗎？」又再避開他的問題。
「我哋有泳會㗎，都有搞習泳班嘅，佢本身識唔識游？」「陳瀡」認真的評估我的問題。
「不如我叫佢直接搵你問啦。欸，我都未有你電話。」唔理Lulu有無佢聯絡方法，抄咗牌、搭咗棚先。
「你哋call我囉，而家都少返學校。」當下取了他的call機號碼。
不知何解我覺得好像有點瘦田無人爭的情況。