《我老婆唔係我女朋友》【那些年／學界比賽／真人】 第四章至六章: 【第六章】 竹 心 理（３）
眾人又非常熱情，每個團員也毫不見外的跟我打招呼，又問我食唔食零食呀，讀邊度呀，參加乜嘢之類，總之熱情得讓我不好意思自閉。Lulu係大喇叭就唔使講㗎啦（幸虧我家的只是小吱喳），可能「怕」我悶吧，打氣之餘，又不停拉著我吹水。
期間碰巧總舵主午飯回來，見到我有點愕然，禮貌的互相點頭就坐到另外一邊了，反而Lulu在他經過時輕輕的叫了：「嗨，師兄。」就突然文靜起來。
我硬係覺得高妹有啲嘢嘅，反正我又不擅長找話題，不如就順著佢個老尷樣問吓啦。「係喎，其實我唔知妳本科讀乜喎。」
「我？讀PE囉。」Lulu隨口答道。
哦～原來又是PE妹…吖，呢期潮流興「睇肉」咩？
「聽講呢，讀得PE嘅，都有自己專長項目喎，妳玩開乜嘢呢？」呢啲情報係聽Leon八返來的。
「啊呀，我玩田徑㗎，阿心無同你講咩，我跳高，有時跑1500。而家功課忙又要搞實習，無時間再玩嚕。」
「無呀，阿心好口密嘅，好少講人哋啲嘢。嘩頂妳，生得咁高仲跳高？哦，妳田徑嘅，噉阿師兄就游水嘅，所以無乜接觸？」Lulu條長腿已經說明佢唔跑得都跳得。
「都係㗎，大家又唔同級，我都係喺O Camp由佢帶先識佢咋。」Lulu說出她認識總舵主的緣由，看來又是組爸杜囡啲下三流手段（唔好意思，我始終對參加O Camp有童年陰影）。