《我老婆唔係我女朋友》【那些年／學界比賽／真人】 第四章至六章: 【第六章】 竹 心 理（１）
竹 心 理
午飯後，Leon返歸，阿祥去返【山大】駐紮地「山區」休息，我自己就柄埋看台高位，戴起墨鏡聽歌瞌眼瞓。
剛剛睡著突然又被人大力搖醒。「起身啦，過嚟我哋嗰邊一齊坐啦。」原來Lulu食完飯返來經過我個位，見我自己一支公，於是想拉我去「園區」那邊一齊坐。
「喂呀，妳由得我自己瞓一陣啦～～」這大半年已經習慣了露宿，席地而睡瞓得好好哋，唔好搞我啦。
Lulu大聲的說：「唔得呀，點可以咁自閉㗎，快啲嚟！」
也不理會我在抗議，逕自揹起我的袋走了開去，無奈下只好跟著她行。
去到「園區」那邊簡直是另一個世界，零食、雜誌、小玩意放滿在看台的凳上，她安頓我坐在她旁邊：「阿心頭先call我呀，問你游成點，我話佢知你入咗決賽喇，所以下晝都要繼續游。」
「哦，好吖。咦？妳都有call機咩。」似乎call機都開始在朋友圈中流行了。
當時傳呼機（Call機）實在是非常普及的通訊工具，在初代流動電話登陸香港後，間接令Call機的機價和月費都大幅度下調，我們學校也曾經有電訊公司來宣傳大專Call機套餐。
