《我老婆唔係我女朋友》【那些年／學界比賽／真人】 第四章至六章: 【第六章】 王教練的賽前部署（３）
「哇～唔准郁來郁去㗎，聽我講埋先呀。」阿心竭力的環抱著我，嘗試停止我促狹的扭動。
她的小嘴幾乎是貼著我的耳背說話的情景，彷彿讓大家回到初次邂逅的K房，當然今晚更親密了。「你記唔記得上次你帶我去練水，嗰個細豬要比賽呢？原本我預咗請飲汽水㗎，點知你又整惑做怪，搞到佢點都輸。其實嗰次我代你比賽，係想畀你知道，我游水都唔叻，但有需要時，我都會勇於參與，總之盡自己全力，成功失敗都做到問心無愧。」
比賽八成是心態，兩成是狀態的真理，局外人未必會知道，只有臨場發揮的運動員，才能心領神會。
她頓了一頓後繼續說：「我問過米叔你哋呢種訓練方式，其實係一種針對『自信心理』嘅訓練，自信係應該由失敗中建立嘅，小朋友先經歷跌倒，進而痛定思痛，努力練習，突破舒適區，從失敗中磨練自己嘅能力。呢種訓練有啲似軍隊或者紀律部隊，以責罵同體罰嘅形式去磨練意志，養成良好嘅心理素質，能夠幫你喺緊張同壓力之下，同樣表現出平日嘅水準。即係話你喺比賽心理方面，根本係由細練到大，你對聽日比賽實在唔太緊張，係咪？」
我自覺又真係對即將來臨的比賽無甚感覺，只好點頭同意。以往比賽前夕的晚上，從來都是輕易的呼呼大睡，從來未有擔心過。