《我老婆唔係我女朋友》【那些年／學界比賽／真人】 第四章至六章: 【第六章】 元洲街邨的邪神傳說（４）
我跟文仔說：「喂細路，你玩嘢呀，都唔同學校，家陣有幾多個『火雲邪神』呀？」
他咕噥著：「點知幾時會調過嚟喎，練定先嘛。」
我再問攣毛：「妳識唔識嗰個殘廢咗嘅同學呀？」
我幾敢肯定如果真有其事，嗰個老師就算唔俾人推出午門斬首，最少都笠住牛鬼蛇神頭罩遊街啦。
攣毛遲遲疑疑的囁嚅：「嗰個殘廢咗嘅同學唔係我哋學校㗎。」
果然攣毛的答案相當有可疑。看來又是校園「柒」不可思議事件啦。
我麗池判官一審宣判：「唓，都無人見過真係有人殘廢，假㗎啦，我話我識一秒出六腳『霹靂狂龍』添呀。」
我都唔明點解自己會陪佢哋癲咗咁耐，雖然兒童心理輔導都是日常義診的範疇之一。
「真係假㗎？」攣毛半信半疑，似乎不服想上訴。
「癡線咩，有學生俾人罰到殘廢，上咗頭條或者《今日睇真啲》啦。醒定啲唔好俾『火雲邪神』罰咪得囉。仲有呀，你班衰神呀，一陣唔好喺泳池練倒立，浸死跌斷骨我唔救你哋㗎，你想練嘅不如練石黑龍嘅『金鐘罩』啦，唔怕畀人打屎忽呀。」最後那幾句是警告班小粉皮勿亂來。
今晚在麗池收工，又在7仔打給阿心，想約她食孖條，打算告訴她今天的開心事，買了張新碟和元洲街邨的「邪神傳說」。那知道她卻嗔怪連連，吟吟噚噚話只是分開了幾個鐘頭，轉個頭又要見面？想睇吓電視都唔得云云。
唉～點會有女仔嫌棄個男友黐身㗎。