《我老婆唔係我女朋友》【那些年／學界比賽／真人】 第四章至六章: 【第六章】 元洲街邨的邪神傳說（３）
「哦，你班粉皮改老師花名。點呀，佢好揪得㗎？易筋經練到乜嘢級數先？」我不以為然。
「啲同學話佢罰學生罰到人殘廢㗎，真㗎！有同學見過佢以前個學生，駝晒背行路都行唔到呀，你知唔知有個明星個名四個字嘅，以前都係俾人用佢呢種方法罰到駝背縮埋一舊。」攣毛一臉認真的說。
佢講的明星應該是「泰迪RB」，大佬呀，人哋兩歲時跌斷脊椎喎，上《歡樂今朝》講過佢嘅非凡童年啦，點會係俾人罰呀。真係信班小粉皮一成，智商變零。
我耐著性子再問：「噉好啦，大家練倒立為乜呢？唔通倒立可以破『黑級浮圖』？」事情似乎愈辯愈明，按著近日報紙雜誌不停吹奏那齣新美劇《X-Files》——The Truth Is Out There！真相應該近在咫尺了。
文仔搶住搭嘴：「聽講練倒立可以預防駝背㗎，萬一『火雲邪神』真係嚟我學校，噉咪唔怕囉。」態度出奇的消極，看來單憑「火雲邪神」四字的金漆招牌，已經有極強的震懾力，令嬰兒不敢哭、小學生乖乖的坐定。
我好生奇怪，乜而家啲老師，可以喺學期中隨時過底跳槽咩？社會團契都未得啦。
我莫霍斯探員（Fox Mulder，那時候西台翻譯做「莫霍斯」）上身，指著攣毛問：「妳讀邊間學校呀？」
「元洲街邨小學四年級C班。」攣毛一來就「響全朵」。
我又問文仔：「你又讀邊間呀？」
「蘇屋邨小學。」文仔也是不假思索就回答。
門小你，謎題咪全部解開晒囉。