《我老婆唔係我女朋友》【那些年／學界比賽／真人】 第四章至六章: 【第六章】 有一種女生叫暖姊（２）
平日晨操完咁早，未會有囡囡返學，所以唔為意望去對面馬路。初時見到有班細路，以為係麗池班人，望真又唔似吖，再望清楚條囡，我頂～原來Lulu嚟嘅。
「鬼整妳咩，Lu…喔…『搣時呂』。」我一邊說一邊磨轆噉磨過馬路（當然是隨意過沒有行斑馬線），行到一半已經見她眨眉眨眼的斜瞄班細路，大打眼色，登時醒起阿心提過Lulu應該在小學實習中，遂硬生生將「Lu竹」兩個字吞返。
她見我咁醒目，居然改得切口叫佢「搣時」，神色立時寬容多了。無見幾個月，Lulu的頭髮留長了點，已經染回黑色，還束了條小豬尾般的短馬尾，一身火紅色美津濃tracksuit，配上她42吋的招牌長腿，散發著清爽可愛、又英氣柔美並存的獨特魅力（嗯，可愛是來自本人對馬尾的主觀感覺），果然有幾分為人師表的態勢。
「阿仁，點解咁早你喺呢度出現嘅？咦～哎呀，點解瘦咗咁多㗎？你唔係有病吖嘛？你個樣咁攰嘅？」Lulu機關槍式的連珠發炮，令我有點不知從何說起。不過仍然可以感受到她關心人的熱情。
「哦～我啱先喺【灣仔池】收工之嘛，開完工梗係攰㗎啦，又無啖好食，咪瘦咗啲囉。妳又咁早嘅？去邊呀？」確實三言兩語間很難將近半年所發生的事情解釋清楚，只能粗疏的回應一下。
「吓！你咁早喺泳池開工，你做清潔㗎？哎吔，無錢都要食飯㗎。」她沉吟了一會：「你食咗早餐未呀，我帶啲學生去運動會之嘛，不如我一陣同你食啲嘢先啦，我怕你營養不良呀。」她指著對面的【灣仔運動場】，一貫的直腸直肚令人哭笑不得。
如果說阿心似媽媽，Lulu就似大姊。