《我老婆唔係我女朋友》【那些年／學界比賽／真人】 第四章至六章: 【第六章 逆流廢青】 有一種女生叫暖姊（１）
【第六章】 逆流廢青
有一種女生叫暖姊
五月某天的清晨，捱完晨操的我，從【灣仔池】步出，這天阿里仔如常的坐私家車自顧自趕返學，肥直則約了其他教練吹水。而我因為剛剛被人用「大辣」級數虐待完，腰酸背痛，自己一兜友戴著耳筒，雙手插褲袋寒著背佝僂前行，踢著人字拖䠋下䠋下之際，正在盤算要走堂還是返學校找心媽呵吓，突然隱隱聽到有人叫我，而且不只一把聲音。
「…阿仁…仁…阿仁…」清晨7點幾未夠8點，我望望後面無人吖；冚家祥～昨晚睇新聞啱先至講話係農曆三月尾，好耐都未到七月十四啦，日光日白門小你唔係咁猛吓嘛…
哎呀～時運高睇唔到聽唔到，耷低頭行快兩腳，點知未夠兩步又聽到。「…阿…仁…呢邊呀…仁…」猛地望向對面馬路【新鴻基中心】門口，只見一個穿紅衣、身材高䠷、蓄短髮的輕熟女生帶著5、6個細路，一齊向我揮手。
望真啲，個個都有腳嘅，仆街嚇得我吖。
話說在港灣道繼季節限定的「冬日風呂」外，「美女學堂」是另一個時間限定的人氣景點。當年【新鴻基中心】頂樓有一家高級行政秘書學校「莎拉貝蒂」，據說報讀這間商專是要面試的，只會取錄樣靚身材正的考生，而且全部囡囡返學都要著OL裙、黑絲（我唔記得有無白絲）、高踭鞋，真係人唔單止索爆，裙都係啪啪聲嘅，「美女值」可說是冠絕全港專科院校！