《我老婆唔係我女朋友》【那些年／學界比賽／真人】 第四章至六章: 【第五章】 初見成效（３）
次日清早又到【灣仔池】晨操，被肥直調侃：「點呀，媳婦仔（潮汕話老婆仔）嚟監場，驚我操～壞你呀？」他故意將個「操」字拉長，語帶雙關。
我有點不好意思：「唔係啦，佢見我手痛擔心啫，今朝係唔係照舊呀？」
「係啦，400／50／50，如果仲酸痛就唔好太用力。」今早的私人操練，肥直都就住就住，所以都不太辛苦亦沒有不適。
第二節開始前在更衣室見到阿里仔，我自然問他上星期練完後有沒有出現痛症了。那知道阿里仔的反應非常大：「嘩～痛到仆街呀，我幾日都無練水，日日攤喺度咋。」估唔到明日之星都咁豪邁，原來我都不算太渣了。我又將我啲拔罐戰跡show畀佢睇吓，佢聽完「包膠」後居然都躍躍欲試。
上星期第一課的「自力煉抗」，只是苦路的起點，隨後每過一段適應期後就會「加辣」。由最初十小辣的「垂直蝶式」游20秒4組，加時五小辣到30秒4組，到適應後開始負重，在腳踝綁上砂袋，最初每隻腳綁1/4 kg的小辣開始，逐漸加到每隻腳1 kg的大辣，即是個人負重2 kg再游「垂直蝶式」30秒4組，喺水中陀住兩2 kg呀仆佢個街，真係會浸死喺池底㗎！好幾次都搞到嗆水要停下休息。