《我老婆唔係我女朋友》【那些年／學界比賽／真人】 第四章至六章: 【第五章】 初見成效（２）
「嗱～唔關我事㗎，我師承死老坑，即是肥佬教練個師兄呢，佢唔好大教壞細咋，我當年同條死老嘢賭汽水，結果都係十賭十輸啦。」突然想起剛才她游蛙式游得不錯，順口問道：「妳游水都幾叻喎，以前有練過㗎？」
她想了一想，神色有點古怪。
「無特別練㗎，都係暑假時同Lulu去泳池游吓咁囉，套泳衣都係同佢嗰時一齊買，之後都好少著嚕。」她瞇起眼睛斜睥著我，原本已經放下的手又再伸過來扭我耳仔，紅著臉的迫問我：「講開我套泳衣，你頭先挨身挨勢噉，過足癮啦？」
滿以為她不再追究抽水單嘢，點知突然又再提起。「嘻～Sorry囉，以後唔敢囉。」心裡都有點不自然。
那知她的回應是我完全不能想像的。「噉又唔使道歉嘅，我又無怪你，話晒係公眾地方嘛，人哋好尷尬啫。」
「咦～妳噉講即係唔係公眾地方就可以為所欲為？」我心諗噉都得？擺明係引人犯罪啫。
她白我一眼，淡淡的說：「我無噉講過呀，不過你係我男朋友，我又好難阻止你對我做啲衰嘢，唯有認命㗎咋，問心你都唔想我出醜人前㗎，係咪？」善解「仁」意到如此「心」明大義的地步，她真的體貼得無話可說。
不過都知她一向低調不想招人話柄，今天的情況應該是真的令她不快，想到此處都有點愧疚。「嗯，我唔知妳咁反感，我以後會檢點嘞。」
「嚡～～」她長長的嘆了口氣再說：「噉畀自己男朋友抽水點都好過畀金魚佬抽嘅。認命啦，人又係我自己揀嘅。」她居然將男朋友比作金魚佬。
「呵～等金魚佬我搵個無人嘅位先大抽特抽咪得囉。」我又乘機拉她貼過來「挨身挨勢」。
「哎吔～對你講嘢真係嘥氣，第二啲嘢又唔見你反應咁快！」她誇張的逃開幾步。
唔一定要揸電單車先有機會貼身攬腰的，游水這種運動都可以好親密的，大家有機會都不妨考慮下。