《我老婆唔係我女朋友》【那些年／學界比賽／真人】 第四章至六章: 【第五章】 阿仁你…生嘢呀？（２）
輕輕翻閱那本Jump（揭書時手也痛），是93年四月出版的第17號（週刊少年ジャンプ93年17号），封面是超級撒亞人的孫悟空，配合《龍珠》正連載到斯路遊戲的最後關頭——【416話 かめはめ波対かめはめ波 最後の決戦】，超級悟飯單手出龜波氣功，反而《入樽》的連載就仍然是湘北對海南的外圍賽——【123話 屈辱】，內容就沒有《龍珠》那麼吸引了。雖則兩篇漫畫本來都應該相當緊張的追看，可是我卻沒有心情。
好死唔死，孫悟飯廢咗隻手，跟我的狀態相約，Leon都唔知攞景定贈慶。
「唔睇嘞，今日無心情，琴晚又瞓唔好，遲啲先一次過睇返啦。」自顧自的別過頭去望阿心，見她戴著耳筒靜靜的坐著看人打籃球，入樽熱潮下，任何時候籃球架旁邊都有人在跟隊射籃，她倒也自得其樂，稍稍安心了一點。
Leon把頭湊過來問：「你睇乜嘢咁入神，有囡𥄫呀？」
無奈地只好指指阿心的位置給她看。
「條囡正咩？啊？點解阿心坐喺嗰度唔去上堂嘅。」Leon發現是阿心後不禁問道。
「佢今日off嘅，唔放心我，專登陪我返嚟囉。」我只好跟他說明。
Leon是極少數知道阿心跟我的關係的人（「雅典娜保衛陣線」由佢一手策劃嘛，事後仲唔問到篤咩）。「嘩～救命～有無墨鏡呀，曬隱死呀頂你，使唔使咁癡纏呀。」他反應非常誇張。
我發出會心微笑：「係呀，佢真係幾緊張我呢，by the way，你唔恨得咁多嚕。」
「吖，你個仆街，你唔係手痛，我實打窒你呀！但係等兩堂咁耐，使唔使攞本Jump佢睇呀？」Leon愛屋及烏，怕她等得悶。我們一節課50分鐘，上兩節都差不多要兩小時。
「佢都唔睇啲噉嘢，我畀咗部Discman佢聽歌解悶喇。」我發現我哋完全無理會係唔係上緊堂。
「呀，講開聽歌，今日有白版碟畀你喎，一陣放break你攞畀佢替換，唔使聽死一隻啦。癡線咩，兩粒鐘都聽同一隻碟。」Leon的細心和資源正好派上用場。