《我老婆唔係我女朋友》【那些年／學界比賽／真人】 第四章至六章: 【第五章】 佢七省肥魚咋啩（２）
今次輪到亞里仔用驚奇的語氣問我：「你唔知黃教練曾經喺全運會破咗蝶式全國紀錄咩？後來好似有人事爭拗先無入國家隊咋。」
在英殖年代，來自北方的資訊可說是非常貧乏，一般這些訊息幾乎都只是以訛傳訛，止於口口相傳。（又或者是我廢青根本不想知）
「吓…我以為佢屋邨肥佬一個咋，我覺得佢似洪K寶扮嗰個林世榮多啲囉，乜佢咁堅嘅咩？」我張大了口，久久不能合上。
「欵，你有所不知喇，佢以前有個外號叫『七省飛魚』㗎，但佢唔肯隨便教人，我爹哋唯有叫佢以前個教練幫口囉。佢贏全運會仲破紀錄，真係全國各省都無人夠佢快㗎。」亞里仔透露了找「大頭好臉」出口的原委。
唔隱係吓嘛…真係比李K欣似我條囡更匪夷所思。（留意到我倒轉來說的嗎？哈）
我不禁莞爾而笑：「七省拳王就聽過啫，七省肥魚咋啩，不過佢操細路又確係好細心嘅。」我大大的不以為然，亞里仔只笑笑就沒有再說甚麼了，此時肥佬又叫繼續。
早上收操後，亞里仔坐私家車趕返學，我和肥直結伴行去搭地鐵，我想起剛才亞里仔的問題。「阿直，乜你唔教成年泳手㗎咩？」
他有點愕然的反問我：「吓，亞里仔話你知㗎？（我點點頭）唔係唔教成年人，係直情唔教街外人。而家教細路都不知幾好，又單純。一陣個學生游得有啲成績，又有人打主意，挑～咪搞。」
以前都有目睹泳手過檔的尷尬情況，卻是第一次聽到有人用教練的角度呻。
「但你又肯教我嘅。」其實我是代亞里仔問的。