《我老婆唔係我女朋友》【那些年／學界比賽／真人】 第四章至六章: 【第五章】 明日之星的陪練員（３）
少年三步併作兩步的走近肥直，有禮貌的點頭打招呼：「請問你係唔係黃教練呀？」
我聽到有人叫條肥佬做教練，對比吓佢個「發福李小龍」裝扮，差點又笑了出來。
「呵呵，你一定係亞里少爺，你好。」肥直跟少年握手。
「嘻，係呀，我係Alistair，叫我亞里（Ali）仔得啦，教練。」想不到少爺仔反而有少許靦腆，感覺倒也平易近人。
「呀，呢個係阿仁，你嘅陪練員。」肥直轉向介紹我。
亞里仔又跟我握手問好：「仁教練，你好。」
我連忙推辭，指住肥直：「唔…唔使，亞里仔，叫我阿仁得喇，佢先係教練。」我這種肥腫難分，跟他拍埋已經相形見絀，仲好意思叫教練，真係受之有愧。
亞里仔謙虛說道：「哦…噉我叫你仁哥哥啦，你年紀大過我，經驗都比我多。」
他又再轉向肥直，突然又從袋中取出一包東西，雙手遞給他。「教練，我爹哋請你笑納，茶米（潮汕話茶葉）嚟嘅。」
「呵呵，多謝晒，其實唔使咁客氣啦，茶米你都識？家己冷（潮汕話自己人）嚟喎。嚟，快啲去換衫先，時間緊迫。」肥佬口說不要，手卻當仁不讓的收下禮物。
亞里仔臨行前還轉頭向我抱歉：「唔好意思呀，仁哥哥，我唔知道你會嚟幫手，無乜嘢準備畀你。」
我急忙耍手擰頭：「唔使，唔使，畀教練夠㗎喇，千祈唔好破費。」阿里仔的親切有禮，周到的打點，使我對他少爺仔的印象完全改觀。