《我老婆唔係我女朋友》【那些年／學界比賽／真人】 第四章至六章: 【第五章】 小粉皮是泳式督導員（１）
小粉皮是泳式督導員
那天清晨差不多5:15，我已經去到【灣仔池】（仆街要4點起身呀），肥直一早在門口等我，反常地他居然穿著整套的綠色愛迪達運動裝（李小龍綠色大肚腩版），頭戴鴨嘴帽遮掩那頭如草的亂髮，成個人登時pro咗！專業教練嘅氣勢返晒嚟，唯一美中不足的仍是腳踏涼鞋（頂，去北河街買對襯色波鞋有幾難呀又，不過我都無資格笑人，我山長水遠過海練水都是踢著人字拖）。
「阿直早晨。」我見他在門口等我，急急腳行埋去打招呼。
「噯呀，咁遲㗎，快手入去換衫熱身，你得半個鐘咋。」肥佬一見到我就拉著我急步入泳池。
大佬呀，你話5:30嘛，我已經早咗15分鐘啦。
我跟著他一邊小跑一邊問：「吓，我自己一個游咋？」
「頭半個鐘係嘅，有啲複雜，你砰砰聲游完半個鐘先，我再同你解釋。快！400熱身加兩組50衝塘，一陣我喺水底睇，執吓你啲動作先。」肥佬呼吸急促的說。因為一邊急步行一邊一輪嘴講嘢，搞到有點狼狽。
二月下旬只有15度的黎明，凛烈的西北海風吹來奇寒徹骨，晨曦的光線又未足夠暖身，由更衣室出來，脫了上衣落水前嗰吓，不是說笑，真是無上意志力的考驗，在岸上停留多一刻，就是多一分折磨，唔理三七廿一狗衝落水開始了。獨霸兩條泳道，中間刻意沒有拉水線分隔（正常是每條水道都會拉線隔開），既自閉又有點怪異。
嘿，「一個人原來都可以盡興」不就是這種意境了嗎？