《我老婆唔係我女朋友》【那些年／學界比賽／真人】 第四章至六章: 【第五章】 灣仔碼頭的搖籃（３）
叫我到【灣仔池】晨操，早起過雞不是問題，交通反而是極大挑戰，要知道一個窮隱，家裡怎會有私家車或司機接送呢，坐的士更是不切實際；話說除了有私家車接送外，最經典的莫過於有人揸架波子911去練水，模型車我都未買得起呢。
所以呢，又回歸文初的老問題，要成為一個專職運動員，有「資源」是相當重要的，唔是去少兩次日本旅行就搞得𠶧囉。
其實中學時，因為公開賽成績達標，老坑直有推薦我參加「種子運動員」計劃，𢯎到在【灣仔池】跟早操的訓練機會，可是清晨練到7點後，由灣仔趕返深水埗在7:45前上學，除了坐的士，靠公共交通工具基本上是不可能趕上的，試過接連遲到（早餐都食唔切，真係慘過雞呀），硬撐了一個多月，最後和尚寺驚動老媽，在她施壓下唯有放棄晨操，只保留在放學後的練習。
你以為學校會因為你的練習而網開一面，甚至為你的訓練時間作出配合嗎？笑話！在屋邨環伺的和尚寺，佢理隱得你因乜嘢理由遲到呢，最簡單直接咪叫佢老母搞𠶧佢啦。方丈最緊張的是每天平穩過度，無驚無險又距離退休近一步了～還記得【長癲】校訓嗎——積極，不參與。
那麼在每天首班巴士、地鐵和小輪都未開的超清晨時份，如何只靠公共交通工具，由石硤尾到灣仔呢？這方面我有經驗呀，是噉的，在石硤尾坐往旺角的通宵小巴到【銀行中心】，然後轉坐到西環的通宵小巴，灣仔【修頓中心】有落，行路過去【灣仔池】，時間尚早的話還可以兜去【杜老誌】、【黑天鵝】附近「賞花」（是啊，有啲靚女在清晨時份收工的），去程差不多一小時多一點。
還好現在不是中學生了，晨操完回程不用趕喉趕命趕返學，反正【建橋】最早的課堂都是八半（8:30），7點練完仍有充裕時間食早餐（雖然只能吃齋多士～），再唔係走堂都仲得，得咗！