《我老婆唔係我女朋友》【那些年／學界比賽／真人】 第四章至六章: 【第四章】 真係雞都不如（３）
「手插入水嘅時候，指尖指向膊頭的嘅前方，成個人側身時做出縱軸旋轉，最後你隻手應該要伸直到盡，形成一直線，將動作放慢凝固半秒，感受喺水中滑翔嘅片刻，然後先繼續抱水、推水、提踭。左右手入水嘅時候，都要刻意練習呢吓動作，等肌肉同埋身體產生記憶，將來就本能噉機械式推動嘞。」一如以往，完成了自己的練習後，我要兼任指導班細路泳式改良。
肥直將學生分成兩批，年紀較大12歲以上的由他操練，年紀較細或泳式未純熟的就由我指導。
「善用身體形成直線嘅呢刻，沿住軌跡向前滑行，有助加快前進速度同埋加強划水嘅效率㗎。我哋叫呢一刻嘅凝固做『惰性滑翔』，成組動作可以令你游水時更慳氣慳力。你哋不妨留意下隔離線班人，佢哋就算衝50自，每一下動作之間都有呢吓滑翔，只不過比較快同短啫。」
說時我又拉停了其中一個細路文仔。「喂，都話放慢動作喏，一下一下仔細做，動作快無用㗎，郁都唔郁嘅？」
妹豬在池邊突然問我：「仁呱瓜你今日贏咗馬呀？」
我好生奇怪，我贏咗馬我自己又會唔知嘅？「吓，我無買馬喎，點解妳失驚無神覺得我贏馬呢？」
「你今日好開心噉樣囉，我老竇贏咗馬就好似你而家一樣。」妹豬天真無邪地開啟老人精模式，世事彷彿都給她看透。
頂～激死，點解個個啲讀心術都咁勁…
「哦，我今日撞返個好多年無見嘅同學，大家講返好多舊陣時嘅嘢啫。」真係發夢都無諗到，我竟然flirt過中學時的阿心，唔通我倆真係有緣？定係佢個老頂穌哥玩cosplay扮月老搞事？這個初次的情人節真是永誌難忘。
「咦？仁呱瓜你喺度笑嘅，嗰個同學係女仔嚟哩？」妹豬 x 天真無邪 x 老人精模式 x 2。
「妳多事啦，唞夠未呀，繼續游啦～」哼，一個二個當我Lulu。
收工後，肥直過來小聲的跟我說：「下星期開始，逢星期二、四，朝早5點半，去【灣仔池】練水。」
我不可置信，瞪大眼看著他，愣住了作不了聲。
肥直大聲的噴我：「咩呀？唔使練呀，你比賽定我比賽吖？」
仆街，今次真係起得比雞早！
（第四章完，待續）