《我老婆唔係我女朋友》【那些年／學界比賽／真人】 第四章至六章: 【第四章】 真係雞都不如（２）
她苦忍笑意：「定情信物你個頭呀，我又唔識你，嗰時淨係覺得你好囂張、好串咋，個頭又染金毛。哼，我攞本校刊畀你睇，係想你記返自己以前幾有自信咋。」頓一頓她見我表情有異：「喂𡃁仔！你做咩嘢咁開心呀？」
「乜呀，無開心呀，我都無笑。」我明明無笑吖。
她斜睥著我：「但你個樣又出賣你喎，你額頭鑿住『我勁開心』喎，諗緊乜嘢衰嘢快啲講呀吓！」
我開心都估到？啲讀心術有無咁堅呀，當下嘻皮笑臉的說：「咁多年妳都仲記住，撞返我嗰陣又吼住我，唔通妳～暗～戀～我？嘻嘻。」
想不到她真的「紅都面晒」，大發嬌嗔：「我啋過你呀，你自大狂啦你，唔同你講呀。」
知道阿王太后薄皮，再玩反面就好難𠱁，笠水情況下見好就收。「好喇，唔講就唔講啦，我去練水喇。」在枱底伸手去拖她，摸摸她的嫩手：「妳自己返屋企小心啲喇，今晚打畀妳吖。」
她依然嘴嘟嘟卻笑意盎然：「唔好搵我呀，唔想同你講嘢。畀心機游啦。」
唔通阿心故意俾我知道，想我啲自信心回血？呵呵，又莫非佢之前真係暗戀我，唔會咁反高潮啩？