《我老婆唔係我女朋友》【那些年／學界比賽／真人】 第四章至六章: 【第四章】 翻閹泳法（５）
門小…游得咁hea，時間都唔慌做得好啦。我邊調息呼吸邊自己在想。
肥直蹲在池邊，待我調息好後問我：「你估吓今次幾多，34秒呀～」
「吓？只慢過頭先一秒咋？」我好生奇怪，何解留力的差距，會跟用盡全力差不多呢？
「嗱，其實你本身個底仲喺度嘅，技術、水感都唔會因為時間而消失咗，只係體能支撐唔到以前嘅習慣，而家我哋重新調整，令身體嘅負荷減低咗，尤其是尾段無出現拖柴，令整體時間拉平均咗。呢種就係『復崗調整法』嘞。嘿，或者應該改叫『翻閹調整法』，專係針對『復崗』泳手嘅思想教育，令佢哋擺脫幾乎已經成為呼吸一樣嘅習慣。」肥直侃侃而談。
「拖柴」是我們練水的術語，意指氣力用盡時，兩條腿無力浮起，就像兩條木柴一樣，拖著身體沉淪，愈游愈慢，愈慢愈拖。不過今天聽人說好像不用「拖柴」這個詞彙，改用「拉車」了。
「噉即係我用呢種『翻閹調整法』，有機會可以喺5個月內恢復水平？」我登時有生出一線曙光的希望。
肥直斜睥著我：「以你嘅根底，理論上提升返30秒以內唔係問題嘅，但都要睇你減磅嘅情況，同之後爆炸力回復嘅程度。點呀，有無繼續食減肥餐呀？」