《我老婆唔係我女朋友》【那些年／學界比賽／真人】 第四章至六章: 【第四章】 型、英、帥女友（４）
「孺子可教吖。嘻，麻煩叫我王醫生吖唔該，心理醫生計時薪做心理輔導，點都比大學講書賺多啲。仲有，請你聽日幫我問問轉系讀Psycho手續，哈哈。仲好講喎，無端叫人落街，人哋沖晒涼嘛，沐浴露香味咋，癡線仔～」原來沖咗涼～難怪滑捋捋、香噴噴啦。
送返阿心上樓，踏上歸途，現在才有空感到肚餓，原來不經不覺被王醫師訓輔了個幾鐘頭，下次都要叫她不要只帶雪條，帶點食物更實惠。
戴上耳筒，又是王靖雯的《執迷不悔》。噢，白板碟還返畀Leon了，正在聽的是二月初出的正價碟了。
〈♫ 我還能用誰的心去體會 真真切切地感受周圍 ♬〉
〈♬ 就算疲倦 就算是累 也只能執迷而不悔 ♫〉
沿著窩仔街行回家，一再細味歌詞，練習縱使辛苦、縱使疲倦，都只能堅持下去了，鬼叫自己耳仔軟應承人比賽咩，好彩有個比自己叻得多嘅女朋友呵下開解下，心態上都正面多了，仲不經意發現了原來「義氣心」都有好型、好有女漢子氣概的一面。（好彩佢唔係阿May噉嘅樣）
今晚回家後，開始記錄身體狀態和訓練進度，看是不是能夠每天都有進步，超越昨天的自己。
雖則「練水」呢味嘢，從來都是一人之境，但今天的我比之以前，毫無疑問是多了一個「心」。
（體重81 kg，50自32秒，距離比賽尚有5個月）