《我老婆唔係我女朋友》【那些年／學界比賽／真人】 第四章至六章: 【第四章】 型、英、帥女友（１）
型、英、帥女友
倚著她半睡的姿勢，嗅著她若有若無的體香，耳聽她的喁喁細語，加上訓練的疲累，使我差不多進入完全放鬆的狀態。「以前中學時都有啲信心，而家根本就係臨時拉夫，點同啫～～」我懨懨欲睡下隨口答她。
「又唔見拉我去嘅？噉都要本身有能力先得㗎嘛，既然你得，咪試試盡力去做囉，你睇吓我想做都唔得啦。你呀，我以前雖然唔識你，但你畀我嘅感覺好似讀咗大專之後，就成個人無晒自信噉，樣樣嘢都收埋晒，成日搵理由推搪，就好似我頭先話你啲性格，人哋叫你先勉為其難應付吓，如果人哋唔叫，豈不是將自己嘅能力親手埋葬咗？」她頓了頓再說：「唔想用，唔願意用，再過幾年出嚟做嘢喏，以後想用都無得用喇。」
我將頭在她頸旁擠了擠，用發晦氣的語氣：「唉呀～乜嘢都好辛苦呀，又輸梗嘅，唔游喇，我乜嘢都唔想做呀。」
「癡線仔，生活有邊個唔辛苦呢，啲人成日話『不吃苦中苦，難為人上人』嘛，我諗你最辛苦應該係中學時嘅訓練啩，而家復操壓力無咁大啦？」
「唔係呀，我以前游比賽都係為自己，而家無端端要頂住個神主牌去獻世，我又怕辜負Leon嘅託付同信賴…」
「唏，你自己唔覺啫，其實你已經超越咗我哋呢種，從無做過代表嘅人的層次，而你仲將個標準定到天咁高添。」