嗰一晚，我用口罩搞咗個人妻: 恭喜晒喎

翌日手機的鬧鐘響起，阿賢不甘願的把吵叫聲按停，在床上典來典去了好一會，才拉着痠軟的身體起床。他心想：「如果畸仔喺度嘅話，我今日射硬波。係喎，唔知條友仔點呢？」趕門藥房，見凌哥毫不友善的盯着他道：「你條友，家陣幾點呀？得得得，唔好講咁多理由，扣人工！」阿賢正想辯駁，卻見眼腫面青的畸仔從貨倉搬着貨出來，便驚問：「咦？點解你啲手手腳腳仲喺度嘅？」畸仔面燶燶不發一言的在阿賢身邊走了過去。

阿賢湊到凌哥身邊低聲問發生甚麼事，凌哥奸笑了一聲後道：「冇嘢嘅，尋晚珊姐同埋李太去咗村屋度同李生講數，你知啦，畸仔冇阿爸阿媽，珊姐當佢半個仔咁，咪乜都攬上身囉。佢拍晒心口話除非阿Sue先拋棄畸仔，否則畸仔絕對唔會拋棄阿Sue喎，跟住畸仔又跪又發誓，竟然打動到李生。後嚟聽李太講，話李生以前都係咁同佢外父發誓，感觸良多之下咪放過畸仔囉，仲話過幾日約律師註冊，話婚宴可以遲啲擺，但要畀個名份阿Sue喎。」

阿賢聞言便跟裝着忙的畸仔笑道：「恭喜晒喎！以後名草有主。記得擺酒時請埋我喎。」畸仔凶巴巴的瞪了阿賢一看，哼了一聲後，便繼續裝着執貨。阿賢當然不會隨便放過畸仔，便問道：「做乜呀？好事嚟喎，冇穿冇爛，唔通阿Sue唔靚？冇理由吖，你話過佢阿媽咁索，個女唔會醜得去邊……哦！我明喇！佢肯定棚牙有問題！佢係哨牙嘅！」見畸仔仍是不為所動，阿賢便繼續說：「我都話佢棚牙有問題啦！如果唔係你使乜咁灰呢？嗱！我介紹個牙科醫生……唔係喇，介紹個整容醫生，磨靚棚牙咪得囉。」

畸仔終於忍不住怒道：「邊個話佢棚牙有問題呀！問題係我唔知點同我班女解釋呀！萬一佢哋大鬧婚宴，你知唔知我會死得幾慘呀！」見畸仔發火，阿賢不敢再刺激他，便說：「又真係幾慘嘅。不過阿Sue唔知你啲情史咩？」畸仔無奈道：「佢知道啲啦，但係佢老豆就知道一清二楚。喺佢嘅嚴刑迫供下，我仲點隱瞞吖。佢話好明白年輕人總係風流，但家陣有咗佢個女，就唔可以亂咁嚟，仲話畀一個禮拜我搞掂晒啲女。唉，我都唔知點講好。」

＜待續……＞