這是我del IG的故事: del IG的十六日前
sem break緊嘅我，日日都過好無趣。
一係返工，一係就約frd食飯，一係就買嘢洗錢。
今日亦都唔例外，返2:15-6:30，返啊媽間補習社。
唔知係啊媽想虐待我定係太睇得起我，俾咗張最難搞嘅枱我睇，所以我要日日對sen細路，一個老師對五個學生，五個學生入面得一個係可以唔駛下下照顧住嘅細路。
雖然係體諒，但日日都要體諒，真係會攰。
「Miss，我可唔可以去廁所啊？」
坐我對面嘅呢個細路，話就話係一個小一學生，但實際仲係個bb，返黎補習社嗰段路仲係工人姐姐抱返黎，返到嚟做功課尤其最鐘意去廁所，兩個鐘可以去三次，但全程冇飲過水。瀨尿亦都係日常事。
我歎咗口氣，放低手上面對緊嘅功課，望下個電話—「2:25」。
屌！！返咗嚟十分鐘就要去廁所，做功課就求其繚兩個字俾我！！！！
努力忍住唔好燥底嘅我，面帶微笑咁但同時係咬實牙關咁同佢講。
「你去啦～」
佢去廁所之後，我爭取時間快啲對埋手上面啲功課，冇得發牢騷嘅我只可以用text msg同frd怒屌下。跟住就拎起部電話，撳開ig搵啊K，因為佢都有返開補習，實明我啲把幾火心情。
：「屌嗰個bb又嚟料，又淨係返黎去廁所，功課就求撚其做！！」
：「好撚想真係放下假啊屌！我想要真嘅sem break！！」
隔咗一陣，啊K就send咗張相嚟，佢都補緊習。
（補習相）
：「真係辛鳩苦⋯⋯都係為錢，唯有淨係諗住出糧」
呢個時候我諗起我個銀行戶口⋯⋯唉，真係算鳩數啦⋯⋯
講起錢，我又諗到有嘢想買。
啊K同我著嘅style差唔多，所以我哋成日講買嘢。我就send咗個post俾佢，係件毛毛褸。
：「我勁想買呢件，諗住去買！」
：「屌你又同我睇同一樣嘢，你轉頭去買嗰陣send張上身圖俾我！」
：「我諗緊買綠色定黑色囉，你諗住買咩色？我廢事同你買同色！」
：「唔係啊～我諗住買俾條囝hehe」
啊K早幾日終於拍拖了，作為佢朋友嘅我十分之開心，終於有人要佢了！！但係唔撚好刺激我呢啲仲追緊囝嘅人好冇？
：「幾時死啫？又點我做嘢，仲要係影俾你買俾條囝！又唔見你影俾我？？？」
「幾時死啫」係我同啊K之間成日講嘅一句說話，係我哋兩個嘅common language?????
都係開下玩笑。
：「試下唔好咁惡先bb～咁惡啲男人好驚㗎！」
我發現大家拍拖之後，講嘢都特別嗲，做咩啫屌！！
我cap低段對話，po咗喺close frd story，我tag咗啊K。
然之後我上賣褸嗰個網，cap低咗其他人試上身嘅圖，然後又po喺close frd，tag咗啊K。
「上身圖啊！望到未啊伸手黨！！」
跟住啊K就reply咗我story，又係鳩up下咁。
我就冇再覆住，仲有其他細路要照顧。
但我仲係下下望住電話個screen，睇下有冇人覆我。
尤其係睇啊M有冇覆我。
因為我知佢喺呢間舖度返工，佢亦都有呢件褸。
不過講明先，戴返十萬個頭盔先。我係啲極貪靚嘅人，唔鐘意嘅嘢，我覺得唔靚嘅嘢我係唔會買。所以並唔係因為啊M先想買嗰件褸嘅，唔知佢有呢件褸之前我就已經睇中咗呢件褸，諗住入手！
望完一次又一次，電話的確有notifications，但仲係冇佢搵我嘅msg⋯⋯
突然間，我唔敢拎起個電話去check佢有冇睇我個story。
等到我就黎放工—「6:24」。
終於等到我最想收到嘅notification。
佢reply咗我story。
：「搵下我？」
我睇到佢個reply，心諗佢無端端話搵佢做乜，我忍住唔撳入去，起碼都等到我真係放工先覆佢。
俾啲矜持啊！！！！！！
過咗六分鐘，啱啱好到「6:30」，我就撳開咗ig，就見佢到有po story，但我未覆佢，所以唔睇住。
我由chatbox最底嗰啲開始睇，再決定覆唔覆。
覆覆下就十分鐘，都隔咗十六分鐘啦，時間唔長唔短，可以覆啦。
我撳入去個chatbox，就見到佢係reply我第二個msg，啫係cap低人哋啲上身圖嗰個story。
佢話搵下佢？？啫係點？？？
我個腦係跳制定係點？完全get唔到佢想講咩，我就以為佢話搵佢影上身圖，因為佢自己有一件啊嘛。
：「咁你係咪影俾我睇先～」
：「個網有，你搵下」
我睇到個msg先get到，跟住我就即刻去睇。
啊係喎，啱先點解冇睇到嘅。
睇完之後，我就覆返佢。
：「睇咗啦～」
：「你想買呢件？我可以返去影俾你睇」
cls⋯⋯返去影俾我睇，心入面好似有100隻小鹿跑出黎咁。
我即刻同啊K講。
：「佢話返去影俾我睇 你睇下 你仲點我去影俾你睇啊！」
：「咪煩啦，決定好買咩色未？」
：「我諗緊囉⋯⋯黑色百搭啲，但綠色好似靚啲⋯⋯」
：「我都覺，咁買綠啦～」
：「但係好似好少著綠色，但係買黑色就會同佢撞⋯⋯」
：「咁你問下佢你買咩色囉」
係喎，點解我又冇諗到嘅。
我覆返啊M。
：「係啊，不過未諗到買咩色，買咩色好啊？我轉頭去舖到睇啊，要影俾我個frd睇」
：「你去邊間？旺角？」
：「觀塘嗰間啊」
本來下定決心今日一定要買到呢件褸嘅我，由將軍澳搭車搭到去觀塘，成程車都等緊佢覆我，佢話買咩色，我就買咩色。
但係佢就冇覆我了。
眨下眼，我去咗嗰間舖，佢都仲係未覆我。
我拎咗兩件褸去試，影低咗上身圖俾啊K睇。
（綠色嗰件嘅相）
（黑色嗰件嘅相）
啊K都冇覆我。
見到冇人幫我話事，我就po咗個story，叫啲followers幫我揀。
又要諗構圖。
就咁用ig個排版，兩張相就勁突兀。
咁用一張做底，然後先再insert另一張落去。
嗯，搞掂！
又要諗caption。
「唔該大家當我之前講嘅嗰句 再買就斬手 係死嘅」
排好個位之後，再加個vote。
搞掂！望下依家幾點先—「7:30」
都應該多人睇嘅⋯⋯po得！
唔駛幾分鐘，已經有好多人幫我揀咗。
有個成日同我傾襯衫嘅frd—啊Z，佢reply我story。
：「綠色啦梗係」
我覆返佢，又重複返同啊K講嘅說話。
：「但好似黑色百搭啲」
：「屌你大把衫啦，都唔會日日都要用呢褸黎襯㗎啦！」
我諗諗下，又好似係。
我再望下個story，揀黑色嘅有60%，揀綠色嘅有40%。
仲要，啊M仲未睇我story。
：「俾我諗埋今晚，聽日買！」
但其實我成晚都冇諗過要買咩色，除咗睇住個story有幾多views，就係望住佢有冇睇我個story。
過咗一個又一個鐘，等到11點，佢睇咗我個story，冇vote，再埋已讀咗我個msg。
又已讀⋯⋯
俾啊M已讀嘅我，去搵啊J。
：「想問其實佢係咪好鐘意已讀人？」
：「做咩事？？？」
：「佢又已讀我，我發覺佢好似有鋪癮咁㗎喎，上次又係傾得好地地，佢就已讀我⋯⋯」
：「點解呢個人咁奇怪嘅，已讀你，但又唔係唔理你，轉頭又搵返你」
：「都唔知係咪下次會搵返我⋯⋯」
俾佢已讀嘅我，係真係好唔好受，因為我approach緊佢。
佢已讀＝唔想理我＝對我冇feel＝我唔夠好
keep住repeat咗呢個cycle諗嘢，諗諗下就朝早三點幾。
呢個時候佢send咗張相黎，係佢出咗去同friend飲嘢嘅相。
佢send佢自己做緊咩俾我！！啫係唔係對我反感啦！！
啱啱嗰幾個鐘頭嘅自我否定一下子就消失咗。
我覆返佢：「壞啊你！」
我再望下個ig story，都600幾個views。
嗯，ok。
最重要係，佢vote咗「綠色」。
好ok啊！！！！聽日就去買！！！！
突然間，我就好眼瞓。
又或者咁講，本來係因為等msg等到唔捨得去瞓，驚佢會無端端send msg黎我會miss咗。
個心已經定返落黎，我就即刻瞓著咗。