這是我del IG的故事: del IG的第二日
尋晚兩點幾就瞓咗，晏晝喊到好攰。
但我朝早六點都扎醒咗，一擘大眼，成個腦全部都係啊M同我講嘅嘢。
好痛苦⋯⋯好痛苦⋯⋯
我轉一轉個身，拎起咗擺喺枕頭隔離嘅電話。
一開個screen，淨係得廖廖可數嘅notifications，比著之前，碌到我個人醒曬都仲未碌完。
原來，冇咗ig，真係會冇人搵我。
我迫自己再瞓，淨係得瞓覺，我先可以唔駛諗起啊M。
但我唔記得咗自己每一次瞓覺都會發夢⋯⋯
：「一唔一齊食lunch」
我電話個screen著咗，佢喺ig send咗msg嚟。
我心諗做咩咁突然搵我食lunch，雖然好想見到佢，但係唔知點解個心總係一啲好嘅預感都冇。
：「喺邊度食啊？」
佢即刻覆我。
：「我過黎搵你啦，你預1點半？」
：「但係你驚唔驚遠啊～你喺荃灣過嚟康城喎。」
：「唔緊要啦。都唔係真係好遠。」
：「咁你差唔多到就我知啦！」
：「好，食完傾兩句？」
傾兩句⋯⋯屌⋯⋯實冇好嘢啦⋯⋯
咁我可以覆咩啊？
冇啊得一個選擇。
就係屌那媽頂硬上⋯⋯
：「嗯好啊～」
佢like咗msg。
我即刻dm搵啊J。
：「屌！！佢無端端搵我食飯，仲話咩要傾兩句⋯⋯」
啊J隔咗唔夠三分鐘就覆我。
：「特登出黎傾嘢？」
：「係啊damn⋯⋯」
：「無嘢嘅我諗，如果係要一拍兩散就唔駛特登再約出黎講啦！喺ig直接remove你，block9你咪得！」
：「講就係咁講啫，但唔知點解真係一啲好嘅預感都冇！好唔想出啊依家。」
係啊。我又想逃避。
出到嚟之後，我哋決定唔到食啲咩，就喺個商場度周圍望下食啲咩。
因為佢一句「食完傾兩句」，我個心就已經吊咗喺半空咁，even個電話喺咁喺我個袋入面震，我都好似sense唔到咁。
今日佢一路都揸住部電話。
個情況好似唔同咗。
行行下，經過一間食日式嘢嘅舖頭，我哋諗住行過去睇下有咩食。
我望下個menu，再遞俾佢睇，之後就問佢。
「你望下menu，呢間你啱唔啱食啊？」
呢個時候，佢開咗電話個screen，並排企嘅我哋，令我望到佢張lockscreen wallpaper。
係佢同一個女仔，頭貼頭，兩個人都笑到瞇埋眼嘅自拍。
我一下子扎醒咗，成個人坐咗起身。
我另轉頭望下鏡入面自己。
我冇喊，但眼神係好空洞。
我拎起擺喺隔離嘅電話，諗住撳開ig，搵人講我啱啱發嘅夢。
因為我有edit自己個home screen，所以有set曬shortcuts嗰啲。
撳一次，冇反應。
撳第二次，都冇反應。
我心諗又lag咗？
啊⋯⋯唔係。
我del咗ig啦嘛⋯⋯我喺度做乜鳩⋯⋯
我撳開whatsapp，同啊J，仲有另一個朋友，啊K講。
：「我又發夢啦⋯⋯」
仲未平復心情嘅我，淨係想講低曬我啱啱發生嘅事，完全係冇諗住要組織自己要講啲咩，完全係諗到啲咩就打一句。
：「我夢到佢同我出街，我睇到佢個lockscreen wallpaper係佢同佢前女嘅自拍」
：「我唔知點啊⋯⋯」
佢哋兩個都未覆我。
我就轉咗喺signal搵另一個frd，啊W。
：「我都知我犯賤」
：「但我夢到佢，我同佢出街，但俾我睇到佢仲set佢同前女張合照喺lockscreen。」
佢隔咗陣就覆我。
：「今日係新一日。又大個咗啲㗎啦！」
：「你今日要唔要返工啊？」
唔知點解，我冇再想呻落去嘅意欲，就直接答佢問題。
：「要啊。」
：「咁你依家應該起身去食個靚早餐，打返個foodie卡。你唔係最叻影嘢食相㗎咩，雖然依家冇得po出嚟，但我相信你影到張靚相都會開心㗎！」
仲係呆滯緊嘅我，完全冇心情去食靚嘅早餐，再講啦，真係完全冇胃口食任何嘢。
：「但我冇胃口食嘢⋯⋯」
：「咁你咪頹頹地碌個杯麵食囉，自己想點就點，亦都唔需要同任何人交代你食得有幾頹。」
又唔知點解我聽咗佢講，碌咗個杯面食。
我有影到相，但不過唔係foodie啲打卡相，係完全冇構圖可言，就咁影低咗個杯麵，然後send俾佢。
（杯麵相）
：「依家食 真係冇諗過自己會影得出呢張咁核突嘅相 siu4」
：「求撚其啦，你都係想share俾我睇啫，又唔係要營造啲咩」
係囉。呢啲先係真係叫做「分享」。
啊J覆咗我。
：「夢境嚟！！假嘅！！假嘅！！」
啊J份人係咁，唔係啲咩道德撚，唔會成埋講埋啲「老母係女人」嘅道理。安慰人嗰陣當人哋細路仔咁氹。
我冇再就住個夢境覆佢。
我醒起啱啱張杯面相，我就send咗俾啊J。
（杯麵相）
：「依家冇ig，淨係可以咁樣send俾你！些牙下！」
啊J就send返張相俾我。
（企喺收銀機前面嘅相）
：「唔好虐待未放飯嘅人士」
我笑咗一笑，諗起自己之前成日夜晚嗰啲時間，會周圍forward ig嘢食po俾人哋。
尤其係啊J，兩個人成日send埋啲好西po俾對方，晚晚都睇到叫春，只要對方一講一句肚餓，下一秒嘢食post就會到。
跟住我錄咗條片，係我夾起啲麵嘅片，然後就send咗俾啊J。
（vdo)
佢秒睇。
：「你睇住黎，陣間我放飯，你準備接招啦！」
跟住再send咗張相黎，低炒嘅角度影住自己對眼—反白眼。
低低能能有陣都唔係壞事，起碼呢一刻係開心嘅。
話晒，啊M都講過，覺得我係低低能能，幾搞笑。
係囉，究竟我係唔係低能呢？
吹下吹下水，我望下個電話—「12:30」。
夠鐘整下我自己個人去返工。
跟住我開apple music，connect埋個speaker，大大聲咁播歌。
我開咗個playlist，諗住播嗰陣，見到playlist第一首歌，我縮一縮，skip咗首歌播下一首。
嗰首歌係我同啊M睇嗰套電影嘅主題曲黎。
我坐咗喺張枱前面，望住眼前面嘅化妝品，醒起啱啱啊W同我講嘅嘢。
「自己想點就點」
只係搽咗防曬同埋畫咗條眉，頭髮就咁求其扎條馬尾，戴咗頂漁夫帽，著啲咩都淨係喺一堆衫入面拎最面嗰件，求其就get ready完。
我拎起部電話，望下個時間—「1:00」。
只係用咗半個鐘就搞掂好曬所有嘢出得門口，相比起之前起碼要用個半鐘先出得門口。
又要化妝，又要襯衫，又要夾頭髮，又要襯個袋。
依家有成九個字時間俾我hea下。
呢個時候，啊K覆咗我，佢冇覆我有關於啱啱我發夢嘅事。
：「散心gogogo！星期日行山點！」
係喎，上一個星期，啊K就話想去行下山，散下心。
諗下自己對上一次行山，已經係四年前。除咗平日減肥要做下workout，中學grad咗就冇再郁過，之前都話會去跳舞。依家嘅生活就係用「有得瞓就唔坐，有得坐就唔企」作為宗旨。
上個禮拜嘅我知道啊K極度需要沉澱下自己，所以諗都冇諗就應承咗。
只係冇諗到下個禮拜，啫係依家，需要散心嘅，
係我。
：「好好笑啊可，好彩我哋約行山，打死都冇諗過要散心嘅唔單止係你，仲有我」
：「去望下風景，同我一齊行下，吹下水，分散下注意力！有我陪你～」
比著之前，我同啊K一定不停上ig睇定啲人嘅打卡相，再諗點打卡。
依家del咗ig嘅我，都唔需要驚冇相po，而特登出去影相，而係真係想capture啲我想記住嘅moment。
我望下依家幾點—「1:30」。
著件褸就出門口返工。
當我諗住隨手拎起件擺喺最頂嘅呢件褸，我又縮一縮手。
我拎開咗呢件褸，揀咗另一件黎著。
擺喺最頂嘅呢件褸，啊M都有一件⋯⋯