因為前世一個承諾，令我今世三十歲都仲係青頭仔: （9）

大雨滂沱，我同欣欣匿喺傘下相互對望，大家都喺彼此身上，感應到熟悉嘅氣息。

佢眼大大、嘴細細、鼻高高，個樣望落去好後生，年紀應該細過我。

至於身材就五個字形容曬，「廟細燈籠大」，瘦底細細粒但上圍非常豐滿，目測起碼有D或者E。

「你可唔可以遞隻手俾我？」欣欣開聲打破沉默。

我無拒絕，伸隻右手出去，然後對方就捉住我隻手。





同頭先一樣，我一掂到佢，個腦就閃過一幅一幅，零零碎碎嘅畫面。

與此同時，欣欣瞳孔擴大，臉上表情由疑惑變成驚訝，係直情驚訝到講唔到嘢。

從佢呢個反應判斷出，佢應該都見到我所感應到嘅畫面：

一個受傷流血嘅我帶住身穿旗袍嘅佢，被趕到入窮巷，最後走投無路之下，我衝上去同嗰班揸住斧頭嘅惡棍浴血奮戰。

單從呢啲畫面睇，感覺就係典型嘅英雄護花情節。





無估錯嘅話，呢啲全部都係我同佢前世共同嘅記憶。

「傑傑，你無嘢呀嘛？有無受傷呀？」呢個時候Samuel跑過嚟，關心我有無俾頭先架的士撞親。

然而，我嘅注意力集中曬喺啲前世片段同欣欣身上，因此無留意到對方叫我。

「傑傑，俾啲反應啦。」跟住條友唔知係咪見到我拖住欣欣，所以就呷醋，出手一嘢抆開我。

手一鬆開，嗰啲畫面隨之消失。





但欣欣即刻捉返實我，並用楚楚可憐嘅眼神望住我講：「係你？真係你！」

下一秒，佢就向前撲埋嚟，緊緊攬住我。

我全身一瞬間有種觸電嘅感覺，隨即腦海又出現flashback。

今次唔係純畫面，而係有聲有畫嘅片段。

我見到自己同欣欣大被同眠，喺床上依偎。

我地嘅髮型同依家好唔同，我梳住老土蛋撻頭，佢就蓬鬆攣髮，咁嘅髮型好有上世紀嘅味道。

片段中，欣欣挨住我膊頭問：「如果有下一世，你會唔會都同我一齊？」

「會，當然會。」我答。





「我唔信，如果你係講真嘅，咁就對天發誓，假如有來世，你都只會同我一齊，淨係愛我一個，絕對唔會掂第二啲女人。」

我好聽話咁照對方嘅說話，舉高三隻手指，然後一字不漏，對天發誓。

就係呢個誓言延續到今世，導致我同唔到其他女人扑嘢，三十歲人都仲係青頭仔。

雖然係好慘，不過算啦，過去嘅就由佢過去，最緊要係依家我終於揾到呢個前世情人，而且身材同樣貌都唔差。

經了解過後仲得知，欣欣原來得廿歲，青春可愛得嚟又大波，都算係屬於「砌一世都制」嘅類型。

儘管只係啱啱相識，但我地彼此間幾乎無任何隔膜，而且一下子就互生好感，萌生情愫。

可能呢啲就係所謂嘅「宿世緣份」。





打鐵要趁熱，即日我就帶埋佢返屋企，心思思要同佢做愛。

識左唔夠半日就搞嘢，咁嘅進展會唔會太快？

我可以答絕對唔會！

當你知道對方係你命中註定嘅人，我相信就算即日同佢生仔都唔會嫌太快。