因為前世一個承諾，令我今世三十歲都仲係青頭仔: （8）

時光飛逝，眨下眼，一個月時間就過去。

呢段日子前前後後，我用交友app約左十幾條女出嚟，結果全部配對失敗，無一個係我要揾嘅人。

尋尋覓覓，搵到我都有啲頹頹地，畢竟不停咁上網識人都係一件幾攰嘅事。

同埋呢排掛住玩交友app約女，幾乎無曬其他活動，連聽Hi-Fi嘅時間都無。

呢日我就take個break，放自己一日假，同左Samuel出去碌齡。





條友早排係咁約我，我就話唔得閒而拒絕左，之後佢又好似以前咁係咁冤住我。

嗰陣我仲以為，佢知道自己唔係我嘅前世情人後，就會慢慢遠離我，點估到隔左兩日又繼續纏住我。

佢同我講，雖然今世我同佢可能有緣無份，無得喺埋一齊，但係佢願意繼續守護喺我身邊。

我真係服得佢交關，都唔知係咪我前世屌左佢屎忽，今世要lur住我還。

「滴噠滴噠—」





天色陰沉，一出門就遇著落大雨，好彩咁啱有帶遮。

我揸車嚟到南華會保齡球場。

收起遮，一進入內，突然間感應到一啲嘢。

一種奇怪嘅感覺，我唔知點樣形容呢種感覺，總之就係好似感應到一啲嘢。

球場櫃檯有一個女店員當值，而佢背對住我，所以我睇唔清佢個樣。





我行過去，想問佢拎對保齡球鞋嚟換。

剎那間，嗰種奇怪嘅感應突然變得強烈。

「傑傑！我幫你拎左鞋啦！」

呢個時候，早我一步到嘅Samuel喺遠處呼喚我。

對方知道我平時著開嘅碼數，因此一早就幫我拎定鞋。

當我視線再轉移返去櫃檯，發現頭先嗰位女店員行開左，嗰股感應亦隨之消失。

雖然感覺好奇怪，但我都無理會太多，照樣如常同Samuel打保齡球。

喺我地隔籬條lane有幾個𡃁仔，睇落只有十六七歲，毛都未出齊嗰隻。





佢地一邊碌齡，一路高談闊論，分享自己嘅做愛經驗：

「隊入去嗰下，嘩入面窄到呢，差啲忍唔住射出嚟」

「都話左架啦，屌閪爽過含撚好多，同埋最正嘅姿勢一定係狗仔式」

「我唔認同，計我話最爽肯定係觀音坐蓮，自己唔洗郁就有得爽」

班𡃁仔年紀輕輕，居然對於扑嘢咁有心得。

我呢個三十歲嘅處男大叔，一路側耳偷聽，內心一路暗自妒忌。

妒忌佢地咁細個就嘗試過性交嘅滋味，反觀自己三十歲都仲係對此一無所知。





平時圍內同啲舊同學聚會，成班麻甩仔分享同女女扑嘢嘅心得，又話咩姿勢插得最入，又話咩九淺一深最攞命。

一講起呢啲話題，我成日都搭唔到嘴，只能憑睇過嘅鹹故鳩噏一餐，真係諗起都覺得羞恥同尷尬。
 
「傑傑，你煩緊前世情人啲嘢呀？」Samuel見我心不在焉，以為我諗緊宿世情人啲嘢。

接住下一句佢就話：「唔洗愁喎，就算你個宿世情人永遠唔出現，咁都唔緊要，因為你仲有我呀嘛，我願意成世守護喺你身邊陪住你架。」

條友失驚無神，喺大庭廣眾講埋啲嘅嘢，搞到我起曬雞皮。

「得啦得啦，唔好再講，都玩到夠皮，我地走啦。」

我放低手上嘅保齡球，拎嘢走人。

「滴噠—滴噠—」





個天仲落緊雨。

我行到出去發現，本來放喺門口把遮唔見左！

「傑傑，你揾咩呀？」Samuel問我。

「我把遮呢？頭先明明放喺度架！」

「可能有人拎錯左，不過唔驚，我把遮夠大，遮埋你都得。」

就喺呢個時候，我見到對面馬路有條女擔緊我把遮。

我認得條女個背影，應該就係啱先企喺櫃檯幫人拎鞋嘅女店員。





豈有此理，不問自取是為賊也，竟然咁衰格偷人把遮！

我冒住雨，衝過去對面馬路捉賊，Samuel想喝我都喝唔住。

「喂小姐！你好似拎錯左我把遮喎！」我快步走上前截停條女。

喺我拍佢膊頭嗰下，腦海猶如走馬燈，閃過一幅又一幅畫面。

一啲我從未見過，但又感覺好熟悉嘅畫面。

下一秒，嗰條女擰轉面，回眸望住我。

我同佢視線一刻對上，內心馬上浮現出一種，一見如故嘅感覺。

「傑傑！小心啊！」遠處嘅Samuel大聲警告。

「呠呠！」

突然之間，有一架失控嘅的士撞緊埋嚟。

我第一時間拉走個女仔，急忙閃避。

當我掂到佢隻手嗰一下，腦中浮現出更多嘅畫面。

我見到自己受左傷流緊血，手中拖住一個著住旗袍嘅女人，喺佈滿雜物嘅窄巷之中，逃避緊一班拎住斧頭嘅人追殺。

畫面中，嗰個著住旗袍衫嘅女人，正正就同我面前呢個女人生得一模一樣。

「砰！」架的士撞上馬路邊嘅欄杆。

我同個女仔啱啱好閃得過，好驚險咁避過一劫。

而啱先喺躲避嘅過程中，個女仔唔小心fing甩左把遮。

我執返起把遮，行返去個女仔身邊，並對佢講：「你好熟口面，我地係咪喺邊度見過？」

「我都覺得你好熟口面，你叫咩名？」個女仔問。

「我叫阿傑，你呢？」

「我叫欣欣。」

此刻嘅我強烈感應到，眼前呢個欣欣，就係我揾左好耐嘅嗰一位宿世情人。